Prissmell for Salmon Evolution

I 2024 fekk Salmon Evolution i gjennomsnitt 93,40 kroner kiloen for laksen selskapet produserte i sitt landbaserte oppdrettsanlegg. I 2025 var gjennomsnittsprisen 69,50 kroner kiloen. 

Prisnedgangen er hovudårsaka til at underskotet blei meir enn tre gangar større enn i 2024 (sjå tabell under). 

Prisane fall på grunn av stor auke i oppdrettsproduksjonen i sjøen.

Utsett slakting
Prisfallet i fjor gjorde at Salmon Evolution har utsett slakting og satsa på høgare prisar i år.

Ved inngangen til 2026 hadde selskapet 3115 tonn fisk i anlegget. Ved inngangen til 2025 sto det 2023 tonn fisk i tankane.

I fjor vart det slakta 4403 tonn (sløyd vekt), og i år ventar selskapet å slakte 7000 tonn. 

Produksjonsstart i steg to
Salmon Evolution sitt anlegg ved Indre Harøy på romsdalskysten er planlagt bygd i tre steg, der det fullt utbygd skal levere 36.000 tonn laksk i året.

Andre byggesteg er snart ferdig og det er planlagt å sette ut første fisken i tankane i slutten av april.

Brems i Korea
I 2021 varsla Salmon Evolution eit avtale med koreanske Dongwon Industries om å bygge eit landbasert oppdrettsanleg i Sør-Korea.

Salmon Evolution skulle gå inn med totalt 200 millionar i ny eigenkapital i eit felles selskap i fleire bolkar, den første på 30 millionar i løpet av april 2021.

Dei to selskapa planla byggestart i 2022 og produksjonsstart i 2024.

Slik har det ikkje gått. I kvartalsrapporten for 4. kvartal 2025 skriv Salmon Evolution at avtalen om å investere gjennom eit felles selskap, er gjort om til ein avtale om at Salmon Evolution skal vere ein teknisk rådgivar på marknadsmessige vilkår. 

Salmon Evolution eig 49 prosent av aksjane i det felles selskapet, men er ikkje forplikta til å skyte inn meir pengar og reknar med å bli utvatna etterkvart. 

Om Korea-anlegget skulle bli bygd og blir ein suksess, gir den nye avtalen Salmon Evolution ein rett i fem år framover til å kjøpe seg opp til 33 prosent eigarskap. 

Kursfall
Salmon Evolution blei børsnotert i september 2020 og har fleire investorar på Nordvestlandet blant dei største aksjonærane. 

Halsebakk-familien - som er medeigarar i brønnbåtreiarlaget Sølvtrans - er nest største eigar, med sju prosent eigarandel gjennom sitt investeringsselskap Ronja Capital.

Rofisk er sjette største eigar, med ein eigarandel på 3,3 prosent. Rofisk eig brønnbåtreiarlaget Rostein og er eig av Odd Einar Sandøy og familie. 

Hittil i år har aksjekursen til Salmon Evoluton falle 8,67 prosent. Før børsen opna tysdag var kursen 4,74 kroner per aksje. Det er like over botnnoteringa på 4,71 kroner aksjen 1. desember i fjor.

Toppnoteringa til selskapet er frå slutten av januar 2022, med 11,24 kroner aksjen.