Rekord på norsk sokkel - aldri produsert meir gass

(NPK-NTB-Steinar Schjetne): Det har aldri vorte produsert meir gass i Noreg enn i fjor – då krigen i Ukraina førte til full stans i leveransane frå Russland, ifølgje Sokkeldirektoratet.

Det er krigen i Ukraina som har skulda – eller fortenesta – for at gassproduksjonen på norsk sokkel sette ny rekord i fjor. Til saman vart det selt 124 milliardar standard kubikkmeter gass, opp frå 116,1 milliardar året før.

– Etter at gasstransporten frå Russland gjennom Ukraina stansa ved årsskiftet, har gass frå Noreg vorte endå viktigare enn før, seier direktør Torgeir Stordal i Sokkeldirektoratet, tidlegare Oljedirektoratet.

Rapporten Sokkelåret 2024 vart sleppt torsdag formiddag. Den er ei oppsummering av aktiviteten på norsk kontinentalsokkel i året som er gått og gir prognosar for investeringar og produksjon dei kommande fem åra.

– Det blir snakka mykje om straumeksport om dagen. Energiinnhaldet i gasseksporten vår er om lag 100 gonger større enn netto straumeksport, poengterer han.

Stabilt høg produksjon
Den førre rekorden vart sett i 2022 med 122,8 milliardar standard kubikkmeter gass.

Aktiviteten på sokkelen held seg nokså stabil, og totalproduksjonen i fjor på lag 240 millionar standard kubikkmeter oljeekvivalentar – det høgaste nivået sidan 2009.

Gassproduksjonen utgjer meir enn halvparten av produksjonen. Mesteparten av oljen og gassen blir eksportert til Europa. Norsk sokkel er svært viktig for energitryggleiken i Europa i mange år framover, meiner direktoratet.

Framover er det venta at produksjonen held fram med å liggje på eit stabilt høgt nivå. Først mot slutten av 2020-talet er det venta at produksjonen skal byrje å minke.

For å bremse det venta fallet i totalproduksjonen, må det leitast nær infrastruktur og i mindre kjende område, og dessutan blir investert meir i felt, funn og infrastruktur.

Mykje leiting, små funn
Leiteaktiviteten i fjor var også høg. Ved utgangen av 2024 var det 78 funn som enno ikkje er vedtekne utbygde. Dei fleste funna er små, men fleire av dei blir vurderte for utbygging inn mot eksisterande felt.

– Vi har sett at sjølv små funn kan skape store verdiar. Analysar vi har gjort av leiteaktiviteten på norsk sokkel viser også at leiting er svært lønnsamt for fellesskapen, seier Stordal.

Investeringsnivået på norsk sokkel er framleis høgt. For 2025 ventar Sokkeldirektoratet investeringar på norsk sokkel for 264 milliardar kroner. Dette er ein auke på 2,5 prosent frå året før.

Sjølv om aktiviteten i industrien er stor no, er det nødvendig med nye investeringsavgjerder for å halde oppe aktiviteten framover. Manglande investeringar vil derimot føre til rask nedbygging av petroleumsverksemda, understrekar direktoratet.

Landskraft = mindre utslepp
Sidan 2015 har det vore ein markant nedgang i utsleppa av CO2 frå petroleumsverksemda på norsk sokkel, sjølv om produksjonen har halde seg relativt stabil. Det kjem i hovudsak av omlegging av kraftforsyning til kraft frå land.

Dei næraste åra er det venta at utsleppa går ytterlegare noko ned per produsert eining sjølv om produksjonen skal auke noko.

Utslepp kjem frå forbrenning av naturgass og diesel i turbinar, motorar og kjelar, ved tryggingsfakling av naturgass, ventilering og diffuse utslepp av gass og ved lagring og lasting av råolje.

Tiltak for å redusere miljøutsleppa frå petroleumsverksemda på norsk sokkel utgjer ein vesentleg del av investeringane fram mot 2030.

(©NPK)