Rett tid for satsing meiner Fagervoll

- Det er lenge sidan det har vore så mykje aktivitet på forespørselssida som sist vinter, seier Per Ivar Fagervoll om interessa for å leige inn offshorefarty. Fagervoll er toppsjef i Golden Energy Offshore-systemet.
Golden Energy Offshore Services, det børsnoterte selskapet i systemet, offentleggjorde i går avtalen om kjøp av to fleirbruksfarty frå Nantong Rainbow Offshore & Engineering Equipments Co., Ltd i Kina.

Fleire beilarar

Fagervoll seier det var fleire interessentar til skipa og at det er i ferd med å bli færre attraktive skip å finne hos kinesiske verft for norske reiarlag.
- Viss ikkje vi hadde tatt dei no hadde andre tatt dei, seier han.
Interessa for å ta over ferdige, men ikkje overleverte skip, og at reiarlag tek skip ut av opplag er signal om at noko er i emning, etter Fagervoll si vurdering.
Tidspunktet er rett og prisen er rett seier han om avtalen med det kinesiske verftet.

Kjenner godt

Det er to skip Golden Energy Offshore-systemet kjenner godt som no blir tatt over av Golden Energy Offshore for cirka 145 millionar kroner pr. skip.
Eit anna selskap i systemet kontraherte skipa for levering i 2016. Men slik marknaden utvikla seg blei overleveringa lagt på is.

No tek altså Golden Energy Offshore Services over, til nesten halv pris.