Richard Grov: -Vi klyp oss litt i armen

Med pengemaskina Loen Skylift som sin fremste attraksjon har Hotel Alexandra-konsernet i Loen hatt ein kraftig vekst og god lønsemd i fleire år. 

2024 blei ikkje noko unntak - og også 2025 har starta svært godt i følgje Richard Grov, toppsjef og største aksjonær.

– Eg har gjentatt meg sjølv mange gangar. Vi har foretatt, kvart år,  store investeringar, og vi gjer det fordi vi trur det skal gi resultat. Og det har det gjort, seier Grov til Nett No.

Valutagevinst og betre tilbod
I tillegg til å framheve dei tilsette og organisasjonen, peikar han på den svake norske krona som ei forklaring på veksten. 

I tillegg meiner han reiselivsbransjen i Noreg greidd å bygge attraktive og gode tilbod. Og - ei svak norsk krone gjer det relativt billegare for utlendingar å kome til Noreg.

Så langt ser han heller ingen teikn til at internasjonal uro har dempa reiselysta, samstundes som han minner om ordtaket om at ingen tre veks inn i himmelem.

– Ein dag må vi kanskje tilpasse oss andre realitetar, men det blir ikkje i år, seier han.

– Ein giftig coctail
Konsernet planlegg nye investeringar, både oppe ved gondolstasjonen på fjellet og nede i bygda.

På fjellet er det mellom anna eit butikkbygg og tilrettelegging for fleire besøkande enn Grov såg for seg då gondolanlegget vart planlagt. I alt er det snakk om ei investering på 40 millionar kroner.

Nede i bygda er det planar om både bustadar, utvida hotellkapasitet og andre næringsbygg. 

Begge planane krev ny reguleringsplan, og arbeidet med dei frustrerer Grov. Det er blitt dyrare og meir tidkrevande og eit trugsmål mot investeringsvilje og evne, etter hans vurdering. Ansvaret ligg på politikarane, meiner han.

– Det sit mange politikarar med gode intensjonar i alle retningar og summen av det har blitt ein giftig coctail, seier Grov.

Han skuldar ikke på kommunen for den tidkrevande prosessen, men instansar høgare opp i systemet.

– Kommunen har eit handlingsrom som er like stort som vengespennet til ein mygg, seier Grov.

Resultat-tabellane for Hotel Alexandra og Hotel Alexandra-konsernet er oppdatert mandag 23. juni, med 2024-tala.