Sandane-selskap i trøbbel

Ideen om å automatisere betaling på legekontora gjorde tidlegare Melin Medical - no Convene - til ei blomstrande forretning. No slit konsernet med milliardgjeld.

Convene Holding hadde inntil 5. august i år forretningsadresse på Sandane i Gloppen kommune, før den blei flytta til Oslo.

Selskapet, som tidlegare heitte Hi Bidco, eig Convene Group som i sin tur eig Convene - tidlegare Melin Medical. Convene tilbyr betalingsautomatar og innkreving av utbetalte rekningar for legekontor landet rundt.

Convene har framleis hovudkontoradresse på Sandane, der det er ti tilsette. I tillegg er det 20 tilsette på avdelinga i Førde. I alt er det 180 tilsette i Convene-sytemet, dei fleste i Oslo.

Melin Medical blei starta av danske Jesper Melin Ganc-Petersen, som ei periode arbeidde som fastlege i Gloppen. Han er største eigar i Convene Invest, som eig Convene Holding.

Les om etableringa av Melin Medical i NETT NO-magasinet 2014. Artikkelen står på side 58-60

Milliardgjeld
Convene Holding har to obligasjonslån, eitt på ein milliard kroner og eitt på 350 millionar kroner.

Tidlegare i haust har selskapet fått utsett frist med å betale attende det største lånet, men no har selskapet ikkje fått obligasjonslågivarane med ytterlegare utsetjingar.

Convene Holding er ikkje i posisjon til betale attende eller til betale renter som er opparbeidd sidan 30. oktober, skriv selskapet i ei børsmelding. Dermed oppfyller ikkje selskapet lånevilkåra.

Les børsmelding her

Convene Holding prøver å få til ein konstruktiv dialog med kreditorane. At selskapet ikkje oppfyller lånevilkåra får ingen umiddelbar verknad på datterselskapa, skriv selskapet i børsmeldinga.

Pant i driftselskap
I følgje låneavtalen har obligasjonslångivarane pant nedover i systemet, slik at pantet også omfattar Convene, ifølgje Nordic Trustee, som forvaltar obligasjonslångivarane sine interesser.

Det største lånet hadde forfall i oktober. Långivarane gjekk tidlegare i haust med på å utsette attendebetalinga til 28. november, men den fristen greidde selskapet ikkje å halde.