Satsar kvart milliard i Lefdal gruve

Målet er å gjere gruvegangane i Nordfjord til eitt av Europas største datasenter. Utbygginga er allereie i gang, og i dag står olje- og energiminister Tord Lien for den offisielle opninga av senteret. Det skjer på ei markering i Oslo, der også IT-selskapet IBM og det tyske IT-infrastrukturselskapet Rittal er til stades.

Ein kvart milliard kroner er prisen for første byggesteg, går det som eigarane av Lefdal Mine Datacenter vonar blir senteret langt større.
Til samanlikning satsar energiprodusenten Tussa 32 millionar kroner på sitt utvida datalagringsenter, som blei opna i vinter.

100 arbeidsplassar

I løpet av nokre år vil gruva ha skapt mange nye arbeidsplassar i området, ventar dagleg leiar Sindre Kvalheim i Localhost Holding i Måløy. Localhost Holding eig mellom anna datalagringselsskapet Localhost og er medeigar i Lefdal Mine Datacenter.
- Vi har skapt 100 arbeidsplassar direkte og indirekte, spår Kvalheim blir fasiten når senteret har vore i drift nokre år.
Det handlar om alt frå transport til elektrikarar, og vil gi IT-ekspertane i Localhost nye oppdrag, ventar Kvalheim.

Lokale eigarar

Største eigar i Lefdal Mine Datacenter ei investorgruppe i Måløy (50,7 prosent) med mellom andre investorpartnarane Egil og Svein Skibenes og Gunnar Carlson som medeigarar, mellom anna gjennom Localhost Holding. Blant dei lokale eigarane er og Coast Seafood.
Sogn og Fjordane Energi eig 16 prosent og Rittal-eigar Friedhelm Loh Group eig 33,3 prosent.
Eigarane har gått inn med 100 millionar kroner i eigenkapital, medan til saman 150 millionar kroner er lånt frå Sparebanken Sogn og Fjordane, Sparebanken Vest og Innovasjon Noreg.

IBM styrer utbygginga

IBM blir leigetakar når datasenteret kjem i drift i august 2016, og har vore med på å utvikle det tekniske designet.
IBM skal og stå for prosjektleiinga under utbygginga.
Rittal, som er ein del av tyske Friedhelm Loh Group, har og skrive under på ein leigeavtale.
Rittal og Lefdal Mine Datacenter har utvikla ei løysing der større datalagrinskapasitet blir bygd i containarar som enkelt og raskt kan koblast til anlegget og utvide kapasiteten.

Billeg straum

God tilgang på rimeleg straum, trygg lagring i gruvegangane og tilgang på sjøvatn for kjøling har vore argumentet for å legge datalagringsenteret til Nordfjord.
Det er billegare å frakte datasignal lang veg gjennom fiberkablar enn å hente straum over same distansen.

Etter planen

I 2013 trudde Lefdal Mine Datacenter på drift frå 2014. Slik gjekk det ikkje.

Det tok mellom anna lenger tid å få på plass avtale med IBM og Rittal enn Lefdal Mine Datacenter først trudde, men dei var verdt å vente på meiner dagleg leiar Jørn Skaane i Lefdal Mine Datacenter.
- Å få store multinasjonale selskap som IBM og Rittal på partnarsida, det er viktig , seier han.