Sævik-familien i Herøy har dei siste åra satsa på hotellverksemd fleire stader på Nordvestlandet. Via selskapet Havila Hotels eig dei no Raftevold Hotel på Grodås og Hotell Ivar Aasen i Ørsta. I løpet av 2020 har dei også investert i Geiranger Fjord Hotels i Stranda.

Førebels har dei til gode å tena pengar på satsinga, ifølgje rekneskapane som nyleg er gjort offentlege.

Dagleg leiar Gunther Dahler i Havila Hotels er likevel positiv, og sikker på at det langsiktige perspektivet til eigarane er rette vegen.

– Det er eit heilheitsbilde i dette, saman med investeringane i kystruten, Fjord1, The Fjords, Widerøe og hotell på Færøyane, fortel han til NETT NO.

Betydeleg underskot på Grodås
Raftevold-hotellet hadde sist overskot i 2017, medan Ivar Aasen-hotellet må tilbake til 2016 for å finne siste år med overskot. Rekneskapane for 2019 viser nye minustal.

Verst er situasjonen på Grodås der inntektene gjekk ned og underskotet opp. Året enda med eit underskotet før skatt på 2,48 millionar av ei omsetning på 11,7 millionar kroner.

Her blei det i løpet av fjoråret investert i nytt hageanlegg, som Dahler fortel er sett stor pris på av gjestane. Han er trygg på at det vil løne seg på sikt.

Auke – men minus i Ørsta
Det dårlege resultatet gjorde at eigenkapitalen på Raftevold blei negativ med 1,8 millionar kroner. Selskapet kom også i brot med kravet til eigenkapital som følgje av eit lån frå Sparebanken Sogn og Fjordane, ifølgje årsrapporten. Banken har gått med på ein «waiver» til utgangen av året.

Ved Ivar Aasen-hotellet auka inntektene til knappe 20 millionar i fjor, medan underskotet blei halvert (sjå tabellat til høgre – under om du les på mobil).

– Ferdig med dei tunge tinga
Dahler fortel at det har vore fleire bygningsmessige investeringar som ventilasjon og branntryggleik, som har tynga resultata sidan Havila Hotels tok over Ørsta-hotellet.

– Her er vi ferdige med dei tunge tinga som måtte gjerast. Trass i korona ser prognosane for Ivar Aasen-hotellet i år meget bra ut med tanke på resultatet, seier han.

Nær seks millionar i ny eigenkapital
No har Sævik-familien gått inn med nær seks millionar kroner i Grodås- og Ørsta-hotellet.

Ei kunngjering frå Brønnøysundregistera viser at aksjekapitalen i Raftevold-hotellet er auka frå 280.000 kroner til 4,2 millionar i starten av september.

Også Ivar Aasen-hotellet har fått inn ny kapital. I juli blei aksjekapitalen auka frå 200.000 til 2,2 millionar. I årsrapporten viser styret til at eigenkapitalen var tapt etter 2019-resultatet.

Vinterstengt og vinterope
I år er hotella råka av koronapandemien, som har ført til periodar med redusert drift og permitteringar for dei tilsette.

Raftevold Hotel har hatt heilårsdrift frå 2012. I haust stengte hotellet i starten av september – og opnar etter planen først i april neste år.

Ved det nyinnkjøpte hotellet i Geiranger går derimot andre vegen. Takka vere ein avtale med entreprenørane som skal bygge heilårsveg til turistbygda, vil hotellet halde ope i heile vinter.

Sævik-familien har også eigarinteresser i Thon Hotel Fosnavåg. Drifta av sistnemnte inngår i årsrapporten frå selskapet Rainbow Hotels saman med tre hotell i Oslo-området.

Les også: Inntektene krympa med 40 prosent for Havila Holding

Pluss før koronakrise for Choice-hotella i Ålesund

Haagensen-hotell gjekk i pluss – så vidt

Flakk-hotella: – Fint for oss at Sunnmøre har mykje bra å by på Raftevold stenger dørene

Kontrakt sikrar heilårsdrift i Geiranger