Satsar stort med rimelege hytter

Steffen Leganger og kameraten Leif Inge Grønning lanserte planane i haust og byggjer no ei demonstrasjonshytte i Pedro-bygget i Stordal og som skal vere ferdig i løpet av kort tid. Hytta skal plasserast nede ved sjøen i sentrum av Stordal og skal lanserast 4. februar.
Dei held no på å utvikle hyttefelt (tomter og hytter) saman med grunneigarar og entreprenører både i Øvre Stordal, Jassvoll i Stordal, Valldal og Kvamsøya blant anna.
- Vi er blitt kontakta av grunneigarar etter at dei har blitt kjent med planane våre. På Kvamsøya er der 4-5 tomter med strandlinje som er klare for sal. I Stordal er vi i dialog med grunneigarar og Busengdal Transport, både for enkle tomter og for felt som vi jobbar med, og som også er klare for sal. I Valldal jobber vi også med eit større hyttefelt fram mot Juvet, seier Leganger.

Moderne, billege hytter

Hyttene er moderne og kjem i seks storleikar til priser som mange kan ha råd til. Hyttene har ein størrelse frå 22 kvadratmeter brutto til 60 kvadratmeter, og der prisen ligg frå 790.000 til 1.590.000 for den største modellen. Då er dei klare til bruk, med kjøkken og bad. Dei har også ei lita hytte på 6 kvadratmeter, som han brukast til utestove eller anneks, her er det berre fantasien som set grenser.

- Eg vil anta at det kjem nokre bestillingar når vi har lansert demonstrasjonshytta og det er mogleg å sjå den ferdig, eg håpar iallefall det. Det har vore veldig god interesse, og så langt er det den største hytta det har vore mest interesse rundt, seier Leganger.
Hyttene skal gje minimale terrenginngrep, og skal stå på pålar. Det vil bli store vindauge og slik at naturen kjem inn i stova. Naturen under hytta vil også vere uberørt.

Hårete mål om 100 hytter i året

Dei er no på jakt etter fleire tømrarar.
- Målet er å ha fleire tømrarlag og kunne produsere tre hytter parallelt i gongen. Vi har eit hårete mål om på sikt å kunne produsere 100 hytter i året og ha opptil 25 tilsette.
Både Leganger og Grønnevik er tømrarar og har lang erfaring med hyttebygging gjennom selskapet I H Bygg as.

Fått god drahjelp

- Vi har lenge tenkt å skape noko nytt, og denne ideen fekk vi rundt påsketider i fjor. Vi byrja å jobbe med planane, og vi har i prosessen med å byggje demohytta fått god støtte og drahjelp av Vekst i Stordal. Vi har også samarbeidsavtaler med leverandørar som har tru på prosjektet.
Dei har fått støtte av Innovasjon Norge, og der dei er med i eit mentorprogram. Dei har leigd inn Frode Færøy som marknadssjef.
- Marknaden er stor, vi har allereie fått henvendingar frå mange stader i Norge. Dette er heilårshytter, og dei kan også passe på campingplassar til dømes. Vi har forøvrig transportavtaler både langs veg, sjø og med helikopter, slik at hyttene kan fraktast ut til kundane.
Dei jobbar i samarbeid med Innovasjon Norge også med eit hyttekonsept nummer to.
- Det er same type hytter, men som skal kunne setjast opp utan behov for tilknytning av vatn og avlaup. Hyttene vil også ha nullutslepp.

Lokale leverandørar

Hovedleverandøren på trelast og ingeniørtenester er Valldal Høvleri. Vestlandstak står for taktekking, Kvik Ålesund står for kjøkken og bad og Modena Ålelsund står for fliser og ovner.
InStordal er invitert til å vere headliner med demohytta på Fritidsmessa i Ålesund i april saman med Kvik og Modena.
Det er etterkvart også aktuelt å stille ut hytta i Breivika i Ålesund ein periode, i samarbeid med nokre av leverandørane.
InStordal vil ha mest mogleg kortreist.
- Vi vil ha alt så lokalt som mogleg, både arbeidskraft og leverandørar. Vi ønsker å gjere eit fotavtrykk for lokalsamfunnet, seier Leganger.

Invitert på messer

Dei har også fått forespurnad om å stille på den store hyttemessa på Lillestrøm i vår.
- Men det er eit år for tidleg. Vi har ikkje ein organisasjon som vil vere stor nok til å ta seg av eit stort antal forespurnader og sal, seier Leganger.
Det er Steffen Leganger som er 100 prosent eigar både av InStordal as og I H Bygg as.