Selde is for 3,3 millionar kroner

Tyske Dirk Kiefer flytta til Ålesund i 2004. Etter å ha jobba som kokk fleire stader, starta den utdanna pølsemakaren i 2018 opp selskapet Lamella, og satsa på sal av iskrem og sorbet i Løvenvoldgata i Ålesund.

Satsinga har gitt resultat. Sjølv om ein fekk koronasmellen og svikt av blant anna cruiseturistar, har omsetninga auka kvart år. I 2022 vart det seld is for 3,3 millionar kroner, og resultatet før skatt enda på 0,5 millionar kroner, opp frå 0,2 millionar året før.

Iskrembutikken har no hatt vinterpause, men på Facebook vert det opplyst at frå og med 25. mars er iskremsesongen tilbake for fullt i Løvenvoldgata med sal av kuleis, softis, milkshake og den berømte spagetti-isen.

Selskapet har ein samla eigenkapital på 0,5 millionar kroner.

Dirk Kiefer eig 60 prosent, medan Ole Henrik Eidsvik eig 40 prosent av selskapet.