Senterpartiet vil sende rydderekning til staten

I ei pressemelding skriv Lien at Senterpartiet har lagt inn i sitt alternative statsbudsjett at staten skal dekkje 75 prosent av utgiftene, inntil fem millionar kroner, til undersøkjingar og risikovurdering knytt til forurensa sjøbotn utanfor 13 verft i Møre og Romsdal og tre verft i Telemark.

Den store pengane byrjar først å rulle om det blir avgjort at sjøbotnen skal tildekkjast eller rensast. Skjer det meiner Lien fordelingsnøkkelen bør vere den same, der staten tek 75 prosent av rekninga, seier han til NETT NO.

Ifølgje Lien har staten gått inn med midlar både i Oslo og Bergen, og å la verfta og lokasamfunna på Norvestlandet ta rekninga åleine vil vere ei urimeleg forskjellsbehandling, meiner han.

Ved 13 skipsverft i Møre og Romsdal og tre i Telemark er det gitt pålegg om å gjere undersøkingar og lage ein tiltaksplan, for å finne ut kva som skal gjerast med forureina sjøbotn ved eigedomane. Rekninga ved ei full opprydding kjem truleg på fleire titals millionar kroner for kvart verft.

Industrien har klaga, men førebels utan å få gjennomslag.

Miljødirektoratet sto i eit vedtak fast på at verfta må gjennomfører kartlegginga og legge ein tiltaksplan for eiga rekning.

Det einaste verftet som fekk fritak var Vard Langsten-verftet i Tomrefjorden i Vestnes. Direktoratet meiner at det må kartleggas meir ved dette verftet.