Ser etter fiskelukke

- Vi prøvar å kome inn i andre område, seier eigar og grunnleggar Olav Harald Hovdenakk.
Før hadde han det så travelt med leveransar til den oljetilknytta delen av maritim bransje at andre marknadar måtte vente, men no er det blitt stillare frå den kanten.
Det slår og ut i reknskapen, driftsinntektene fall med i overkant av 20 prosent i fjor (sjå tabell).
- Vi har hatt ein ganske betydleg nedgang som du ser, seier Hovdenakk.

Nøyaktig

Dreia og fresa metalldelar, der nøyaktigheita blir målt i 100-dels millimeter, er spesialiteten til tre-mannsbedrifta Hovdenakk Maskinering i Åmdalen i Ørsta. Blant kundane er Rolls-Royce Marine, Heimdal Propulsion og Finnøy Gear & Propeller, men også vegbelysing- og vegsikringsutstyrsprodusenten Vik Ørsta, og no nyleg også MMC, Havyard Group sitt datterselskap med fiskeri- og oppdrettsnæringa som kundar.
Olav Harald Hovdenakk starta heime i reiskapshuset i 1997, samstundes som har dreiv gard og jobba i industrien. I 2002 avvikla han gardsdrifta og sa nokre år etter også opp hos Rolls-Royce, og satsa på heiltid.

Nye kundar

I august i fjor kunne han og sonen Kjetil, og svigersonen Stian Eriksen, flytte inn i nytt fabrikkbygg ved Vatnevatnet i Åmdalen. Sjølve flyttinga tok tid og gjekk ut over omsetninga i fjor, men vel på plass har dei fått ein meir lettdriven verkstad.
Hovdenakk har fått med seg heile oppturen knytt til oljebransjen, men no bur hans eg på at det kan bli nokre år med null-resultat.
- Det er mange som slest om det som er, seier han.
I tillegg til å jobbe seg inn i nye bransjar ser Hovdenakk også mot å jakte på kundar utanfor Nordvestlandet.