Eit tidlegare fryselager i Måløy sentrum blir til 8000 kvadratmeter kontorlokale og fellesareal.

Fleire kjende bedrifter og verksemder i Måløy har signert intensjonsavtale om å flytte inn i det nye bygget; Localhost, PWC, Whereby, MMR Ocean Blue, Ecobait, Azets, Mørenot, Måløy Vekst og Fagskulen i Sogn og Fjordane.

Peak Måløy ill peak måløy — OPNAR OPP: Det tidlegare fryselageret blir opna opp med fleire vindu og ombygging mellom dei to fløyane. Målet er innflytting i 2024. Illustrasjon Peak Måløy.

No skal Pål Anders Kårstad bruke hausten til å få avklart pris og detaljar om korleis bygget skal byggast om og få signert bindande avtalar med leigetakarane.

Planen er å vere ferdig til innflytting i 2024.

Les også

Jobbar med å fylle opp ny møteplass

Møteplass
Ideen bak Peak Måløy er å tilby moderne kontorlokale og skape eit miljø som gjer bygget til ein møteplass for både nye og etablerte bedrifter.

Bygget skal huse både kontor og fellesareal.

- Det vi ønskjer å bygge her er ei næringsklynge. Når du i dag skal rekruttere unge nytilsette så betyr miljø svært mykje og kan vere avgjerande i rekrutteringssamanheng, seier Kårstad.

Forspørsel frå Ulsteinvik
Kårstad og medinvestorane hans starta det første Peakhuset i Førde, og etablerte seinare eitt i Florø. Huset i Førde og Måløy er begge eigd av selskapet, medan Peak-huset-bygget i Florø er leigd på langtidskontrakt.

Modellen har vekt interesse. Kårstad seier han også har fått forespørsel om å etablere seg i Ulsteinvik.

Den forespørselen tek han på alvor.

- Eg kjem til å reise opp i slutten av september, seier Kårstad.