Silda lengre nord enn nokon gong

(NPK): Den norske vårgytande silda har forlate dei tradisjonelle gyteområda sine utanfor Møre og Romsdal og Trøndelag til fordel for Lofoten og Vesterålen.

– Vi har aldri dokumentert ei så nordleg fordeling av silda som i år, seier havforskar Are Salthaug.

Han var toktleiar under Havforskingsinstituttet sitt sildegytetokt i perioden 13.–26. februar.

Knapt ei sild sør for Lofoten
På toktet var det knapt ei einaste sild å sjå, før forskarane kom til Røsttunga, rundt 60 nautiske mil vest-sørvest av Røst i Lofoten.

Heile 82 prosent av sildebestanden stod i år utanfor Lofoten og Vesterålen, og dei resterande 18 prosent stod nord for Andenes.

Are Salthaug seier at dei ikkje kan gi eit sikkert svar på kvifor det har blitt slik, men at det er fleire teoriar. Han fortel at dei jobbar med å teste ut fleire ulike forklaringar.

Kan ha skjedd tidlegare
Det viser seg også at sildebestanden er dominert av fisk frå den sterke 2016-årsklassa, og at desse no utgjer halvparten av heile bestanden. Ein teori er at silda frå 2016 har fått eit innfall, og sidan det er så mange av dei, så må resten følgje etter.

– Det nye gytemønsteret kan også ha skjedd i tidlegare tider, men vi har ikkje observert fråvær av norsk vårgytande sild på gytefelta sør for Røst gjennom moderne fiskeri eller forsking, seier Are Salthaug.

Sjå fleire resultat frå toktet (ekstern lenke)

Forskarane såg meir tre- og fireåringar enn normalt under toktet.

– Det er eit positivt teikn for framtidig rekruttering til gytebestanden, som lenge har vore prega av ei eldrebølgje, avsluttar Salthaug.

(©NPK)