Skal lage gass og protein av sargassotare

Hyperthermics i Ulsteinvik har inngått ein intensjonsavtale med Londonbaserte Ultramar Energy Ltd om testing og utvikling av to biogassanlegg eller proteinanlegg i Mexico.
Anlegga skal fôrast med tarestorten sargassotare, som driv i land på strendene.
"Vår teknologi er basert på ekstremofile bakterier som trives i høye temperaturer. Ved å sette vår løsning som start på prosessen som omdanner det organiske avfallet til biogass eller protein, får man redusert omdanningstid og mer biogass," seier administrerande direktør Erlend Haugsbø i Hyperthermics i ei pressemelding.
Prosjektering av anlegga og testing av sargassotaren startar no og meininga er å gjere intensjonsavtalen om til ei kontrakt i løpet av 2021.

Finansiell partnar

Ultramar Energy Ltd er også ein finansiell partnar for Hyperthermics. Det Londonbaserte selskapet og Hyperthermics har også inngått ein intensjonsavtale og at Ultramar Energy Ltd skal bidra med 30 millionar kroner for å finansiere bygging av tre andre fullskala biogass-og proteinanlegg.
"En svært viktig avtale for oss. Vi har en unik bioteknologi som effektiviserer omdannelsen av organisk avfall til biogass og proteinmasse. Vi møter stor interesse i markedet, men de første kundene ønsker en risikoavlastning, som vi nå har fått på plass med Ultramar Energy. Løsningen er delt eierskap inntil anleggene har bevist sin effektivitet og driftssikkerhet," seier Haugsbø i pressemeldinga.
Intensjonsavtalen om finansiering blir bindande når avtalen om bygging er bindande.
Haugsbø seier til NETT NO at han håpar at alle fem prosjekta vil falle på plass i løpet av 2021 og 2022.

Lang veg

- Med ein gang vi får kontrakter på plass skal vi begynne å tilsette folk, sa Hyperthermics-sjef Erlend Haugsbø til NETT NO i juni 2020.

Vegen fram mot eit kommersielt gjenombrot har vore lang.
I 2016 trudde Hyperthermics at selskapet skulle få sitt første kommersielle sal av biogassanlegg i løpet av 2017. Året før hadde renovasjonsselskapet Lindum og Hyperthermics blitt enige om å drive eit pilotanlegg frå Hyperthermics på Lindum sitt biogassanlegg ved Drammen.
Hyperthermics Holding er største eigar (22,61 prosent), energiselskapet Vardar (21,69 prosent) nest størst. Majoritetseigar i Hyperthermics Holding er Jan Brevig Remmereit. Han grunnla mellom anna helsekostselskapet Natural og er medeigar i helsekost- og legemiddelselskapet Arctic Nutrition.