Skal styre finansane til Flakk

Christian Olav Balsnes er tilsett som «chief investment officer» i Flakk Gruppen i Ålesund. 

Han startar i sin nye jobb 2. desember, opplyser hans nye arbeidsgivar i ei melding. 

Kjem frå lakseeksport
Balsnes kjem frå jobben som finansdirektør i Ocean Supreme som er ein av regionens største lakseeksportørar. 

Han starta i Ocean Supreme i 2022 etter å ha vore  ansvarleg for forvaltninga av investeringane i rådgiving og investeringsselskapet Converto. 

Der var han i kring ni år, avbrote av ein periode som finansdirektør i MMC First Process i 2021. Balsnes har også jobba i Nordea tidlegare. 

Skal vidareutvikle strategi for eigarskap
Flakk Gruppen har hovudkontor i Ålesund og omfattande eigarskap i ulike selskap. 

Balnes skal mellom anna jobbe med finansiell oppfølging og vidareutvikle gruppa sin strategi for aktivt eigarskap, heiter det i meldinga. 

Konsernet er eigd av Flakk-familien. Verksemda omfattar mellom anna tekstilbedrifta Devold of Norway, hotella Hotel Brosundet, Storfjord Hotel og Hotel Union Øye i tillegg til industriselskapa Hexagon Composites, Hexagon Purus og Norwegian Hydrogen.