Slutt på drahjelp frå valuta

Svakare krone gjer at eksportørar får betre betalt sjølv om prisen i utlandet ikkje endra seg. Frå å ligge rundt 10 kroner pr. euro i midten av mars, steig kursen til toppnivået 12,67 kroner per euro 20.mars. Tysdag kveld var kursen 11,31 kroner per euro.
Det slår kraftig ut i eksportverdien. Volumet av eksporterte torskefisk (sei, hyse og torsk), gjekk ned med 4,13 prosent i første kvartal, men verdien gjekk opp 8,26 prosent, i følgje
Den gunstige valutautviklinga meir enn kompenserte for mindre fisk i første kvartal, samanlikna med første kvartal 2019.

Prisfall i utlandet

I utlandet har prisane gått ned på grunn av koronakrisa. Framover kan ikkje næringa vente at eksportverdien skal få hjelp av ei stadig svakare krone. I 2020 har lågare kvantum blitt kamuflert/kompensert av svakare krone. Det vil truleg endre seg neste år, etter Hafsås si vurdering.
I fjor var eksportinntektene frå sei, torsk og hyse til saman 14,4 milliardar kroner.

Sterkare krone

Hafsås trur krona vil styrke seg (som reduserer eksportinntektene målt i norske kroner) frå mars 2020-nivået av fleire grunnar:

• Noregs Bank vil støttekjøpe krona for å halde kursen oppe.
• Norges Bank har stimulert lånemarknaden med nye tiltak.
• Noreg lånefinansierer ikkje støttepakkane for å hjelpe næringslivet gjennom koronakrisa, men tek av oljefondet.
• Når koronaepidemien ebbar ut, vil investorane vende seg mot mindre valutaer igjen.

Koronaeffekt

Sterkare krone, kombinert med reduserte fiskekvotar og prisfall i utanlandsk valuta betyr at eksportverdien av norsk torskefisk kjem under press i år.
Hafsås trur koronaeffekten i marknaden vil forsterke seg framover:
"Med koronasituasjonen hengande over oss, der me samtidig må forvente at den forverrar seg ytterlegare, vil det gi utfordringar både for fisket, produksjon, distribusjon/logistikk og sal. Hovudbilete ein truleg likevel må forvente, er redusert kjøpekraft og endra konsummønster ei god stund framover. Dette vil truleg hovudsakeleg slå ut på eksportprisane, og ikkje nødvendigvis i volum", skriv han i analysen.