Sterk lærlingvekst i industrien

Volf er ein av dei 20 nye bedriftene som har blitt medlemsbedrift i OTEK Sunnmøre, Opplæringskontor for tekniske fag i løpet av dei to siste åra. I dag har OTEK Sunnmøre 60 medlemsbedrifter med over 100 læreplassar. OTEK Sunnmøre er eigd av medlemane.
Dagleg leiar Ruth Astrid Rødal i OTEK Sunnmøre er svært fornøgd med responsen frå bedriftene. Dei tek på seg eit samfunnsansvar med å gi utdanningstildbod og bygge kompetanse som både industrien og samfunnet får glede av. Utfordringa no er å få tak i nok lærlingar.
- Vi har bedriftene, men vi manglar lærlingar, seier Rødal.
Hadde ho hatt kandidatane kunne ho hatt opptil 15 lærlingar til ute i bedriftene.

Treng folk

Volf lagar utstyr og anlegg til både fiskebåtar, fiskeindustri og anna matindustri. Selskapet hadde 28 millionar kroner i driftsinntekter i 2018, ei dobling på fire år, og har auka arbeidsstokken år for år.
I år ligg selskapet an til å passere 60 millionar kroner i driftsinntekter og har 31 personar på lønningslista, medrekna lærlingane.
Dagleg leiar og medeigar Leif Egil Orvik i Volf er klar på kvifor selskapet satsa på lærlingar.

- Vi slit med å få tak i folk når vi søkjer, seier han.

Frykta papirarbeid

Orvik seier frykt for eit omfattande papirarbeid om dei tok inn lærlingar var ein ein grunnane til at bedrifta tidlegare ikkje hadde lærlingar. Det var ei ubegrunna frykt har det vist seg. Volf har ein person som har ansvaret for å følgje opp lærlingane i bedrifta, men det meste av de administrative arbeidet Orvik var redd for er det OTEK Sunnmøre som tek seg av.
Den andre grunnen til at bedrifta ikkje tok inn lærlingar før er at det har vore lett å hente kvalifisert arbeidskraft for Mellom- og Aust-Europa. Slik er det ikkje lenger.
- Det har vore ei lita sovepute. Du har sloppe å tenke på rekruttering, seier Orvik.

Får jobb

Rødal seier lærlingane ikkje har vanskar med å få arbeid etter læretida. Nokre går og vidare på skule og kjem attende til bedriftene med teknisk fagskule eller ein akademisk grad.
Alt i fjor skreiv NETT NO om lærlingemangel i industrien.
- No får nesten alle tilbod om jobb når dei får fagbrevet sitt, sa opplæringskonsulent Bjørn-Ove Aaland i Opplæringskontoret i Haram til NETT NO.