Stortingskomiteen har utsett tidsfristen

Næringskomiteen skulle opphavleg kome i mål med forhandlingane om regjeringa si fiskekvotemelding denne veka, men har utsett fristen til mandag 22. april.

Det stadfestar saksordførar Willfred Norlund (Sp) som har ansvaret for å leie næringskomiten sitt arbeid med meldinga.

Mandag 22. april er ei veke før datoen meldinga skal behandlast i Stortinget.

To ulike syn
Kvotemeldinga vart lagt fram i januar i år. Regjeringa vil mellom anna flytte ein del av fiskekvotane frå fleire fartøygrupper over til dei alle minste fartøya.

Høgre og Venstre er usamde og meiner regjeringa ikkje skal endre på den fordelinga som store deler av fiskerinæringa tilrår ikkje skal endrast på, medan mellom andre SV meiner regjeringa ikkje går langt nok i å omfordele kvotar - til gunst for eigarane av dei minste fartøya.

Uviss om utfallet
Stortingsrepresentant Alfred Bjørlo seier han er uviss om kva som blir utfallet, og at det er lite framdrift i forhandlingane.

- Det er som ein veldig seig TV-serie, med veldig lite framdrift i kvar episode, seier han.

- Eg høyrer kva dei politiske partia seier, eg høyrer kva bredden i organisasjonane seier og det er at ein ønskjer eit så breitt forlik som mogleg, som kan stå seg. Det håpar eg også at stortingspolitikarane vil lytte til, og ut i frå kva eg har høyrt så seier dei aller fleste at dette er eit godt grunnlag for å få til ei einigheit, sa fiskeriminister Cecilie Myrseth til Nett No under bransje og arbeidsgivarorgnisasjonen Fiskebåt sitt årsmøte i februar i år.