Fiskarane deira provosert av kvotemeldinga

Reaksjonane frå dei tilsette på kvotemeldinga, gjorde at Strand-reiarlaget i Ålesund for første gong leverte eit eige høyringssvar i ei politisk sak.

– Vår tilsette reagerte, og vi verdsett engasjement. Difor fann vi det riktig å sende eit eige innspel, fortel Janne-Grethe Strand Aasnæs til Nett No.

Ho er dagleg leiar og medeigar i Strand Havfiske, som utgjer den eine delen av det familieeigde fiskebåtreiarlaget. Søskenbarnet Solveig Strand leiar systerselskapet Strand Rederi.

I den nyaste episoden av podcasten Podium forklarar Strand Aasnæs kvifor dei er kritiske til forslaget frå regjeringa.

Høyr den nyaste Podium-episoden:

Har fått betra lønnsemda
I forslaget til regjeringa blir det føreslått å styrke posisjonen til dei minste kystfiskarane til fordel for trål- og havfiskeflåten.

I podcast-episoden fortel Strand Aasnæs at fast kvotefordeling – slik det har vore i kring 20 år – har skapt stabile vilkår for bransjen.

– Det har vore med å betre lønnsemda i bransjen, og gjort at vi har vore i stand til å fornye oss, og vere klar til å vere med på det grøne skiftet, seier ho.

– Å ta frå oss fisk no på bekostning av våre tilsette, meiner vi er feil, legg fiskebåtreiaren til.

Til saman har Ålesund-reiarlaget 84 tilsette om bord på dei to trålarane Havbrun og Havstrand.

Råkar fiskarane direkte
Ålesund-reiaren påpeikar at lønnsordningane i fiskeriet, gjer at forslaget vil råke fiskarane direkte på lønningsposen, når reiarlaget får fiske mindre.

– For desse gruppene i trål- og den konvensjonelle havfiskeflåten, utgjer det ein nedgang på nesten åtte prosent, seier Strand Aasnæs.

Reiarlaga har lagt bak seg nokre svært gode økonomiske år, som har gitt millionløner til fiskarane.

Fiskebåtreiaren påpeikar samtidig at dei ventar betydeleg auka utgifter for drivstoff og avgifter – utan at bransjen førebels har gode alternativ til «grøne» drivstoff.

– Her blir vi «stuck in the midle», meiner Strand Aasnæs.

Store verdiar står på spel
Sveinung Flem frå Sunnmøre og Romsdal Fiskesalslag (Surofi) er også gjest i den nyaste Podium-episoden.

Også han er kritisk til å opne døra til ei anna omfordeling, og meiner det vil skape usikkerheit i ei næring som allereie er prega av usikkerheit.

Surofi-leiaren påpeiker at det er store verdiar som står på spel for Nordvestlandet når kvotane i fiskeriet skal fordelast.

– Dette har stor betydning for folk som bur i Ålesund og heile Møre og Romsdal fylke, seier han i podcasten.

Landets største fiskerifylke
Møre og Romsdal er landets største fiskerifylke, og store delar av trålflåten og ringnotflåten er mellom dei som har base i regionen. Berre i Ålesund – som er landets største fiskerikommune – er det busett fleire enn 500 fiskarar.

– Svært mange av desse jobbar på båtar som Janne-Grethe representerer, legg Surofi-leiaren til.

Flem meiner óg det er ei feil framstilling at det er gjort urett mot folk langs kysten i fiskeripolitikken.

– At kysten er blitt avfolka grunna fiskeripolitikken er heilt feil – og eg forstår ikkje argumentasjonen som ligg bak, seier han - og viser til at kring 250 kommunar i landet har fiskeriverksemd.

– Folk har fått eit levebrød
Flem meiner det er eit blindspor når det blir gitt inntrykk av at det er ein motsetnad mellom å skape lønnsemd i bransjen, og det å oppretthalde busetnad langs kysten.

Sjølv om det har vore kraftig nedgang i talet på fartøy heilt frå andre verdskrig – har talet vore stabilt dei siste 10-15 åra.

– Det er fordi folk har fått eit levebrød, som det går an å leve av, seier han.

Kvotemeldinga skal opp til debatt i Stortinget den 29. april.