Strammar inn koronatiltaka

NPK-NTB: Viss du bur saman med ein som har fått påvist koronasmitte, må du frå no av sitje i karantene til du har fått negativt testsvar.

Regjeringa kjem no med to innstrammingar i karantene- og isolasjonsregimet for å redusere trykket på helsetenestene, varsla statsminister Jonas Gahr Støre (Ap) då han tysdag gjorde greie for koronasituasjonen i Stortinget.

* Viss du bur saman med ein som er smitta, må du halde seg i karantene inntil du har fått negativt svar på din eigen koronatest. Det gjeld anten du er vaksinert eller ikkje. For å sleppe karantene må vaksinerte teste seg på nytt innan sju dagar, medan uvaksinerte må teste seg dagleg i sju dagar med heimetest eller annankvar dag med PCR-test.

– For barn er dette ikkje ei plikt, men ei tilråding, understreka Støre.

* Er du sjølv smitta, må du halde seg isolert i fem dagar, ikkje to som har vore gjeldande regel fram til no. Du må òg ha vore feberfri i 24 timar.

– Det vil vere behov for skjerpa tiltak i visse situasjonar. No er vi i ein slik situasjon, sa Støre.

Munnbind-tilråding
Regjeringa tilrår også bruk av munnbind på kollektivtrafikk, taxi og kjøpesenter for å bremse spreiinga av koronaviruset.

– Det blir innført ei nasjonal tilråding om å bruke munnbind i kontakt med tilsette i helsevesenet. Vi tilrår at det blir brukt munnbind på kollektivtransport, i taxi, i butikkar og i kjøpesenter der det ikkje er mogleg å halde avstand, sa Støre i Stortinget.

Han sa at regjeringa vil føre vidare tilrådinga om å teste skuleelevar i område med aukande smittespreiing.

Kan handtere pandemien
Støre meiner Noreg har handtert pandemien betre enn andre land, og at vi har gode føresetnader for å handtere pandemien vidare.

– Noreg har handtert pandemien betre enn dei fleste andre land. No skal vi klare å halde kontrollen gjennom vinteren, seier Støre om koronasituasjonen til Stortinget.

Støre meiner Noreg har dei beste føresetnadene for å klare å handtere pandemien gjennom vinteren med vaksinasjon, at vi har økonomiske musklar til å halde sjukehus og kommunar i gang, og at vi har gode fagmiljø.

– Vi er på veg inn i ein periode der vi ikkje kan rekne med at smitten blir borte – den må kontrollerast. Målet er at vi kan leve med smitten utan at vi overbelastar helsetenesta eller innfører tiltak som grip for hardt inn i liva våre, seier statsministeren.

Ber folk ta vaksine
Støre kom også med ei innstendig bønn til landets uvaksinerte.

– Den klare bodskapen min til alle som no har takka nei, er: Takk ja og vaksiner dykk, sa Støre frå Stortingets talarstol då han tysdag presenterte koronastrategien til regjeringa.

Støre understreka fleire gonger at vaksinasjon er det mest effektive tiltaket mot koronaviruset.

350.000 personar over 16 år er ikkje vaksinerte i Noreg i dag, og om lag 600.000 personar har ikkje teke minst to dosar, ifølgje Støre.