Større fart i helsekostmarknaden

Ordreinngangen i heleskostmarknaden hittil i år, svarar til over 90 prosent av inntektene Arctic Bioscience hadde i heile 2023, skriv selskapet i ei børsmelding.

Selskapet i Hovdebygda i Ørsta lagar helsekostprodukt basert på silderogn. Samstundes arbeider selskapet med å utvikle og få godkjent eit legemiddel mot hudsjukdomen psoriasis, også det basert på silderogn.

Inntil legemiddelgodkjenninga eventuelt er på plass er det helsekostmarknaden som sikra inntektene.

I fjor var det på 33,8 millionar kroner. Ifølgje måndagens børsmelding er det allereie sikra at inntektene i år blir på over 30 millionar kroner.

Nok pengar
Mesteparten av den gode ordreinngangen, slår ikkje inn som inntekter før seinare i år.

I første kvartal i år hadde Arctic Bioscence 6,1 millionar kroner i driftsinntekt, mot 7,8 millionar kroner i første kvartal 2023. Driftsresultatet før av- og nedskrivingar (ebitda) blei minus 12,7 millionar kroner mot minus 12,1 millionar kroner i første kvartal i fjor.

Selskapet har 74,6 millionar kroner ståande på bok eller som lett tilgjenglege midlar. Det er nok til å gjennomføre den store studien av psoriasislegemiddelet som selskapet er i gang med, slike selskapet tidlegare har opplyst, seier administrerande direktør Christer Valderhaug.

Svar i september
Den siste deltakaren i ein stor internasjonal studie av middelet Arctic Bioscience satsar på skal få godkjenning som legemiddel byrja å ta middelet i starten av mars.

Testperioden varer i seks månadar, slik at dei første resultatat frå studien er klar i september/oktober.

Ytterlegare ei stor studie må til for å få godkjenning. For å finansiere den er både partnarskap eller kapitalutviding alternativ.