SV ut av sonderingane

(NPK-NTB): SV-leiar Audun Lysbakken seier at felles front frå Ap og Sp i oljepolitikken er ein hovudgrunn til at partiet hans trekkjer seg frå sonderingane.

– Det er ingen løyndom at der møtte vi ein situasjon der vi stod ganske åleine, erkjende Lysbakken.

Men det finst ikkje eitt punkt der det skar seg, seier han på spørsmål frå NTB.

– Det er heilskapen som er avgjerande. Men oljepolitikken, utsleppskutt, naturvernspørsmål har vore viktig, men også skatt og ikkje minst ønsket om å gjere velferda profittfri, seier Lysbakken

– Godt samarbeid framover
Ap-leiar Jonas Gahr Støre håpa på eit anna utfall, men seier at dei vil samarbeide godt med SV sjølv om partiet har trekt seg frå regjeringssonderingane.

Ap-leiaren karakteriserer samtalane med SV som gode, tillitsfulle og respektfulle.

– Vi har ein veldig god tone oss imellom, personleg, men også politisk, sa Støre til pressa ved Hurdalsjøen Hotell onsdag.

– Eg veit at vi vil ha eit godt samarbeid framover. Eg har respekt for at dei kom til denne konklusjonen, seier Støre, som samtidig er open om at han håpa på eit anna utfall.

Opne for forhandlingar seinare
SV er opne for å forhandle om ei fleirtalsregjering seinare i fireårsperioden.

– SV vil når som helst i fireårsperioden vere open for å forhandle om danninga av ei raudgrøn fleirtalsregjering, vilkåret vil vere at det blir forhandla med blanke ark, seier Lysbakken.

– Det er eit håp eg delar om moglegheita skulle by seg. Vi kjem til å ha nær kontakt og samarbeider godt med SV, kommenterer Støre.

Mister fleirtalet
Med SV ute av prosessen ligg det an til ei mindretalsregjering med Ap og Sp. Dei har til saman 76 av Stortingets 169 mandat.

– Partiet vil opptre konstruktivt viss regjeringa søkjer fleirtal med oss, men vil då stå fritt til å ta opp alle saker, også dei som det ikkje har vore mogleg å få gjennom i regjeringssonderingane, understrekar Lysbakken.