Tøft år for Sydvestor

Investering- og kapitalrådgivingselskapet i Ulsteinvik er godkjent verdipapirforetak, og driv med formuesforvaltning, prosjektfinansiering, tilrettelegging av emisjonar og kjøp, sal og samanslåing av selskap.

Driftsinntektene i fjor er dei lågaste selskapet har hatt sidan 2005. Toppåret var i 2011, med 29,3 millionar kroner i driftsinntekter. Det året vart resultatet før skatt 9,8 millionar kroner. I 2020 blei det tre millionar i minus. (Sjå tabell)

Investeringar, kjøp og sal i offshorefartøy-marknaden var den dominerande verksemda til investering- og kapitalrådgivingselskapet Sydvestor fram til oljeprisfallet i 2014 utløyste ei krise for offshore-reiarane.

Usikker situasjon
"Styret forventer fortsatt en usikker situasjon fremover på grunn av den globale situasjon forårsaket av coronavirustiltak og det lavere aktivitetsnivå. Selskapets drift forventes derfor å bli justert løpende i forhold til varigheten av spesielt nedgangen relatert til kapitalmarkedet og investeringsvirksomhet spesielt", skriver styret i årsmeldinga for 2020.

Dagleg leiar Frede Uldbæk seier han ikkje har behov for å kommentere resultatet i fjor eller utviklinga i år.

Ny vekst
Tidlegare i år skreiv NETT NO om korleis Sydvestor skal få ny vekst.

Då var Tom Elvøy nyleg blitt partnar i Sydvestor AS med base i Bergen.

Elvøy kjem frå jobben som senior vice President hos DVB Bank og har meir enn 25 års erfaring frå internasjonal shipping og bankverksemd, med fokus på finansiering av skip.

Planen er å etablere eit kontor med ein til to tilsette også i Oslo. Sydvestor har i tillegg eit samarbeid med eit liknande miljø i London. I samband med at Elvøy er blitt partnar er det gjennomført ei kapitalutviding, der Elvøy og nokre investorar til frå Bergen kom inn på eigarsida, saman med partnarane Uldbæk, Jostein Sætrenes og Sigvald Skeide.