Tregt sal av sentral Ålesund-tomt: – Stille i marknaden

No er det kring eitt år sidan DNB Næringsmegling sende ut prospektet for Skutvika-området på Aspøya i Ålesund til moglege kjøparar. 

Håpet då var å vere i mål med ei sal av området før sommaren i fjor. 

Slik gjekk det ikkje, og eigedomen er framleis til sals, fortel hamnefogd Ole Christian Fiskaa til Nett No.

– Det er stille i marknaden. Vi har hatt noko interesse, men ikkje noko fast fisk, seier han. 

– Har ikkje dårleg tid
Ålesundregionens havnevesen er seljar av området på kring 50 mål til saman. Her kan det bli plass til opptil 500 nye bustader i gangavstand frå sentrum.

– Prosjektet er gryteklart, og det er berre å sette i gong om det melder seg kjøparar, seier Fiskaa.

Sjølv om bygg- og anleggsbransjen meinte botnen blei passert i løpet av fjoråret, er det framleis historisk låg aktivitet når det gjeld nye prosjekt.  

I dag blir området leigd ut til lager for å sikre inntekter. 

– Vi har ikkje dårleg tid. Drifta står seg greitt ved å leige ut på kortare kontraktar, legg han til.

Sørside-utbygging dreg ut
Arbeidet med å få til ei utbygging på Sørsida – som vil knyte Skutvika-området tettare til sentrum - har teke lengre tid enn planlagt. 

Hamnefogden opplever ikkje at det er ei utfordring for å kome fram til eit sal. 

– Det er vanskeleg å seie, men det er ikkje noko vi har høyrt. Det er to ulike områder, sjølv om dei ligg tett ved kvarandre. Eg forstår at eigarane våre i kommunen, ser potensiale for byutvikling begge plassar uavhengig av kvarandre, seier Fiskaa. 

Frigjort etter flytting av konteinarhamn
Eigedomen i Skutvika blir selt «as is», som det heiter i prospektet.

Tomta slik den framstår i dag, kjem av etableringa av konteinarhamna i 1996 – som sidan er flytta til Flatholmen på nordsida av byen.

Lengst vest ligg to areal som er peika ut som naturlege områder å starte med, omtala som BKB1 og BKB2. Potensielle kjøparar kan også legge inn bod berre på desse. 

Her er det anslått at det er mogleg å bygge 11-12.000 kvadratmeter med bustader og drygt 1000 kvadratmeter næringsbygg.