Det landbaserte oppdrettselskapet Atlantic Sapphire må løyse sitt kortsiktige behov for pengar i kassa innan 31. mars for å unngå at selskapet bryt lånevilkåra, skriv selskapet i ei børsmelding.
Atlantic Sapphire varsla i februar i år at det arbeidde med ei refinansiering. I dag fortel selskapet at det treng mellom 25 og 30 millionar dollar (240 og 290 millionar kroner) for å halde det gåande fram til det meiner å kunne drive med eit driftsresultat før av- og nedskrivingar (ebtida) i balanse, i første byggesteg av anlegget.
Atlantic Sapphire forhandlar med sine største aksjonærar og andre sentrale partar for å få til ei løysing. Selskapet skriv i børsmeldinga at det ventar å få til ei løysing, men per i dag er forhandlingane ikkje i mål.
Langt bak skjema
Atlantic Sapphire driv eit landsbasert oppdrettanlegg ved Miami i Florida.
Kapitalutviding selskapet arbeider med no er ei av ei rekkje kaptitalutvidingar, og selskapet ligg langt baks sitt eige framdrifts-skjema.
Då Atlantic Sapphire henta inn 1,2 milliardar kroner i ei kapitalutviding sommaren 2022 skulle pengane mellom anna finansiere andre byggesteg av anlegget. No er det framleis å få lønsemd i første byggesteg det handlar om.
Adresse på Nordvestlandet
Atlantic Sapphire har framleis hovudkontoradresse i Vikebukt, men verksemda foregår i USA.
Medgrunnleggarane Johan E. Andreassen og Bjørn-Vegard Løvik vart etterkvart kraftig utvatna gjennom alle kapitalutvidingan og selde seg til slutt heilt ut.
Hittill i år har aksjekursen i selskapet falle 29,35 prosent, og selskapet er verdsett til 176 millionar kroner. I februar 2021 var kursen oppe i over 40.000 kroner aksjen. Før børsen opnar i dag er den 4,91 kroner aksjen.
Publisert: 23.03.2026 08:42
Sist oppdatert: 23.03.2026 08:46






