Tvungen mekling i lønsoppgjeret

NPK-NTB/NETTNO: Fellesforbundet og Norsk Industri går som venta til tvungen mekling for å lande lønnsoppgjeret i frontfaget. Dei avbryt dermed den frivillige meklinga.

Også forhandlingane mellom fagforeininga Parat og Norsk Industri går til tvungen mekling.

Tvungen mekling hos riksmeklar Mats Wilhelm Ruland byrjar onsdag. Klarer ikkje partane å bli samde der, blir det storstreik frå 7. april. Fellesforbundet varslar at 14.301 arbeidarar kan bli tekne ut i streik om meklinga ikkje fører fram.

– Dette første uttaket vil bidra til ein effektiv streik som vil ramme arbeidsgivarsida hardt. Skulle vi ende i konflikt, vil det fortløpande komme fleire uttak, seier Fellesforbundet-leiar Jørn Eggum i ei pressemelding.

Frist ut 6. april
Frontfagsoppgjer går som oftast til tvungen mekling. Meklingsfristen går ut ved midnatt laurdag 6. april.

Det er tilsette i 134 bedrifter som kan bli tekne ut i streik søndag. Varselet omfattar mellom anna 2100 tilsette i Aker Solutions.

Fellesforbundet har til saman meldt plassoppseiing for 32.108 medlemmer som går på tariffavtalen Industrioverenskomsten.

Fellesforbundet har gått inn i oppgjeret med krav om mellom anna reallønnsauke og etter- og vidareutdanningsreform.

Desse bedriftene på Nordvestlandet kan bli tatt ut i streik:

• Brunvoll
• Brunvoll Volda
• Entec Brimer, avdeling Kvamsøy
• Kongsberg Maritime, avdelingane Longva, Brattvåg, Ulsteinvik
• Linjebygg, avdeling Molde
• Nog People
• Pon Power, avdeling Ålesund
• Kis Nord, avdeling Ålesund