(NPK-NTB/NETT NO): Det regjeringsoppnemde utvalet som kjem med råd om framtida for pelsdyrnæringa har delt seg nesten på midten.Fem medlemmer i utvalet går inn for berekraftig utvikling av næringa og meiner velferda for pelsdyr vil vere teken vare på dersom regelverket blir etterlevd.

Eit mindretal på tre personar går inn for styrt avvikling. Desse meiner det er usikkert om dyrevelferden kan takast vare på når rev og mink blir haldne i nettingbur på små areal.
Eitt medlem i utvalet ønskte ikkje å gje noko tilråding.
Utvalet hadde i oppgåve å vurdere berekraftig utvikling og styrt avvikling som to hovudalternativ for framtida for pelsdyrnæringa.

Stortingsfleirtal mot

Fleirtalstilrådinga frå utvalet er i strid med Stortingsfleirtalet, som i førre veke rådde regjeringa til å vurdere å avvikle pelsdyrnæringa.

Vedtaket vart fatta av alle parti på Stortinget, med unntak av Senterpartiet og Miljøpartiet Dei Grøne (MDG).

280 pelsgardar

Gloppen og Ørsta er dei største pelsdyrkommunane på Nordvestlandet. Gloppen med sine 14 pelsdyrgardar er den tredje største i landet, målt i talet på oppdrettarar. Det viser ein rapport konsulentselskapet Oslo Economics laga for Norges Pelsdyralslag i 2012. Ørsta kjem på åttandeplass, med åtte oppdrettarar.

På landsbasis omfattar næringa om lag 280 pelsdyrgardar, som eksporterte pels for 350 millionar kroner i 2011.
Tyngdepunktet for minkproduksjonen (som er størst) ligg i Rogaland og for rev i Trøndelag. I Sogn og Fjordane var det 29 oppdrettarar og i Møre og Romsdal var det 17 då rapporten vart laga. Målt i talet på oppdrettarar er dei to fylka høvesvis fjerde og sjette pelsdyrfylke.

Høyring i vente

Utvalet, som vart nedsett i fjor, har hatt i oppgåve å vurdere berekraftig utvikling og styrt avvikling som to hovudalternativ for framtida til pelsdyrnæringa.
– Denne næringa er stadig oppe til debatt, og det er bra å få faktabasert informasjon å vurdere desse spørsmåla ut frå, sa landbruks- og matminister Sylvi Listhaug (Frp) då rapporten vart overlevert til henne måndag formiddag.
Listhaug vil no sende rapporten ut på høyring. Ho seier at ho ventar stort engasjement i høyringsrunden.
Etter høyringa skal regjeringa trekke ein konklusjon om framtida til næringa. Eit klart fleirtal på Stortinget har allereie vedteke å be regjeringa vurdere forbod mot pelsdyroppdrett.

Omstridd næring

Pelsdyrhald i Noreg er i dag lønsamt og konkurransedyktig internasjonalt. Men næringa er også svært omstridd, og slik vil det halde fram med å vere.
– Uansett kor strengt regelverk ein legg til grunn for dyrevelferden til pelsdyrhaldet, vil motstanden mot pelsdyrhald aldri forsvinne, sa utvalsleiar Anne Karin Hamre då ho presenterte rapporten.
I tillegg er næringa utsett for svingingar i marknaden internasjonalt.– Utvalet meiner det først og fremst er næringa sjølv som har ansvar for å halde oppe konkurransekrafta, sa Hamre.
Næringa får i dag rundt 40 millionar kroner i tilskot frå staten.Dersom næringa skal bevarast, bør det ifølgje utvalet forskast meir på alternativ der det ikkje vert nytta nettingbur.
Utvalet meiner vidare at eit eventuelt forbod mot pelsdyrhald i Noreg bør kombinerast med ei kompensasjonsordning. (©NPK)