Vard-oppdrag for 10,2 milliardar kroner

Til saman har Vard hala inn oppdrag for 10,2 milliardar kroner i årets ni første månader. I løpet av siste kvartal åleine er det snakk om sju nybygg og ein ordreinngang på 3,3 milliardar kroner.
Ordreinngangen hittil i år er allereie større enn den var i heile 2015 og i heile 2014.

Satsa i nye marknadar

Då selskapet la fram rekneskapstala for 2015 varsla det og ei satsing på nye marknadar. Vind, oppdrett, cruise og patruljeskip skulle gjere skipsbyggingskonsernet mindre avhengig av oljebransjen.

No meiner konsernet at teikna på den nye satsinga byrjar å betale seg, i første omgang i form av fleire oppdrag.
Blant oppdrag i år er til saman seks ekspedisjons-cruiseskip, mindre cruisefarty utrusta for å gå i tøffe farvatn og ein fiskebåt.

Går i minus

Etter eit underskot på over 1,2 milliard kroner i 2015 var Vard attende i pluss i første kvartal i år, men både andre og tredje kvartal gjekk i minus, og så langt i år har Vard eit resultat før skatt på minus 102 millionar kroner.
Trass i oppsvinget i ordreinngangen i har Vard ein lav kapasitetutnytting av verfta i Noreg, skriv selskapet i presentasjonen av tredje-kvartalsresultatet, og levering av fleire større offshorfarty forsterkar den tendensen.

Ombygging og vedlikehald

Akkurat som Ulstein Verft vil gjer har Vard-konsernet satsa på å utnytte ledig kapasitet til ombyggings- og reparasjonsoppdrag.

I tillegg har Vard permittert deler av arbeidsstokken når det har vore for lite å gjere.