No må vi stå samla for Stad skipstunnel

I ei tid der vi burde stå samla for å få realisert Stad skipstunnel, vel vi i staden å krangle innbyrdes. Vi spelar oss sjølve dårlege, medan motstandarane av prosjektet, som heller vil bruke pengane på Austlandet, får servert ein lett jobb med å stoppe prosjektet.

Vi er heilt i sluttspurten for Stad skipstunnel. Kystverket har allereie brukt nær 300 millionar kroner på prosjektering, regulering, grunnkjøp og anbod. Tre entreprenørar har meldt si interesse. No er vi inne i ein prosess med anbod med forhandling. Det betyr at Kystverket først skal forhandle med entreprenørane for å få fram den endelege prisen og den beste løysinga. Om dei innleiande tilboda blir offentleggjort no, blir konkurransen ugyldig fordi tilbydarane kan tilpasse anboda sine i forhandlingane, og to år med arbeid går rett i vasken.

Likevel brukar vi no tida på å angripe kvarandre. I valkampen vil partia markere seg og skaffe seg poeng ved å skyte på kvarandre, også dei som eigentleg står saman om tunnelen. Resultatet er at vi spelar kvarandre dårlege, medan Østlandspressa og dei som alltid har vore mot Stad skipstunnel kan lene seg tilbake og sjå oss rive kvarandre i filler.

 Ja, Jonas Gahr Støre og Sylvi Listhaug kom med klønete utspel under folkemøtet i Trondheim, direktesendt på NRK. Men både Arbeidarpartiet og FrP har seinare vore tydelege. Dei står bak Stad skipstunnel. Torbjørn Vereide frå Arbeidarpartiet, Judith Kvåle frå Arbeidarpartiet og Terje Søviknes frå FrP har alle løfta fram prosjektet og argumentert godt for kvifor dette er ei framtidsretta investering, og at dei vil jobbe for å realisere prosjektet.

Difor er det heilt feil tidspunkt å så splid på. Vi må stå samla slik at Kystverket får forhandle ferdig, slik at Stortinget får ein reell prislapp å ta stilling til, og slik at bygginga kan starte.

 For kvifor skal vi bygge Stad skipstunnel?

• Fordi den gjev trygg og føreseieleg seglas året rundt på ein av dei mest vêrutsette strekningane i landet.
• Fordi vi veit at 80 prosent av kystrederiene sine medlemmar vil bruke tunnelen. Havila Kystruten, brønnbåtar, servicefartøy, fiskeri og havbruksnæringa kjem til å bruke den.
• Fordi prosjektet gjev betre beredskap, mindre utslepp og eit løft for reiselivet.
• Fordi massane som blir tekne ut skal nyttast til verdiskaping og positiv samfunnsnytte i heile regionen.
• Fordi den bind Vestlandet tettare saman, gjev nye bu- og arbeidsregionar og nye moglegheiter for hurtigbåtpendling.
• Fordi den er eit nasjonalt prosjekt som styrkjer forsyningstryggleiken, verdiskapinga og næringslivet langs kysten.

Kostnadsveksten er heilt på line med alle andre infrastrukturprosjekt i Noreg frå 2021 til 2025. Ingen overraskingar. Dette er berre det alle visste kom til å skje når byggjekostnader aukar generelt. 

Difor må vi, alle som vil ha Stad skipstunnel, både vestlandspolitikarar, parti, næringsliv og innbyggjarar, slutte å krangle med kvarandre. No må vi stå samla mot dei som alltid har vore imot prosjektet. Vi må krevje at investeringane også skal kome til Vestlandet, og vi må få gjennomført dette prosjektet som vil gje tryggleik, verdiskaping og framtidstru langs heile kysten.

NettNo har bedt Djuvik om døme på intern usemje. Han sende desse lenkene:

Erling Sande: https://www.fjordabladet.no/nyhende/n/XjrJR7/frykteleg-skuffande-av-frp-og-ap
Olve Grotle: https://www.fjt.no/nyheter/n/AvoBJA/er-prosjektet-skrinlagt-i-saa-fall-maa-vi-faa-tala-paa-bordet