Kom med tre tips til fjernarbeid

Voldingen Tarjei Munthe Vassbotn er rekna som ein av dei fremst teknologane i landet, og var mellom deltakarane på Ulsteinkonferansen «The New Normal» torsdag.
Der kom han mellom anna med tre tips til kva ein bør tenke på for å lukkast med sokalla fjernjobbing – eller «remote work» - ein måte å jobbe på som for mange har blitt heilt nødvendig i kjølvatnet av koronapandemien.

Tror på fleksible arbeidsplassar

Vassbotn har bakgrunn som leiar av «internet of things»-avdelinga til Google, eit selskap som sjølv nyttar store summar på å gjere kontorlokala spennande på ulike måtar.
Samtidig var dei tidleg ute med å avgjere at dei tilsette skal jobbe frå heimekontor fram til neste sommar, grunna koronapandemien.
– Det har skjedd ei endring både hos arbeidsgjevarar og tilsette. Min påstand er at dei bedriftene som klarar å lage fleksible arbeidsplassar, vil stå sterkare, sa han.

Tre faktorar viktige

Vassbotn har melom anna vore med å bygge opp teknologiselskapet Disruptive Technologies frå Volda – i lag med tilsette andre plassar i verda. Han har kome fram til tre faktorar som er viktig å tenke på for både leiarar og tilsette som skal jobbe saman frå ulike geografiske stader.

• Samkøyring
• Autonomi
• Asynkront arbeid

Ba tilsette gi terningkast

Det å vere samkøyrde, handlar ikkje minst om å ha tilsette som identifiserer seg med verdiane i bedrifta, påpeika Vassbotn. Han rådde også leiarar til å ta ein prat med alle sine tilsette ein gong i veka – og bruke samtalene aktiv i leiarskapen.
– Eg brukte be mine tilsette om å kome med eit terningkast for korleis dei hadde det. Når vi snakkar saman må vi samtidig vere ærlege og ha empati med kvarandre, la han til.
Autonomi handlar om å gjere folk i stand til å jobbe på eiga hand og ikkje vere avhengig av andre sine avgjersler. Samtidig må ein gjere folk i stand til å jobbe asynkront – det vil seie til ulike tider.
Vassbotn rådde bedrifter til å investere i skikkeleg utstyr – til dømes lydanlegg – som gjer arbeid frå heimekontor praktisk å gjennomføre.
Å jobbe på felles diskar digitalt, og bruke verktøy som Slack er andre nyttige hjelpemiddel når folk ikkje berre jobbar ulike plassar – men også i ulike tidssoner.

Meir om konferansen:

Tore Ulstein:

(ekstern lenke)