Skarpe reaksjonar på framleis skjenkestopp

(NPK-NTB-NETT.NO): Både NHO Reiseliv og hovudorganisasjonen Virke kjem med skarpe reaksjonar på for i Stortinget, og seinare måndag snakka med pressa om.
Reiselivsdirektør Kristin Krohn Devold i NHO er skuffa over at regjeringa ikkje følgjer FHIs tilråding om å oppheve den nasjonale skjenkestoppen.
– Det vil auke konkursfaren i reiselivet og set tusenvis av arbeidsplassar i fare. Nasjonal skjenkestopp er eit altfor inngripande tiltak for kommunar med låge smittetal, og regjeringa bør la kvar kommune følgje opp den reelle smittesituasjonen sin saman med næringa, seier Krohn Devold i ei pressemelding.
Ho vil no at kompensasjonsordninga skal utvidast til å dekkje ein større del av lønnsplikta til arbeidsgivar. Finansminister Jan Tore Sanner har varsla ein ny krisepakke frå regjeringa i slutten av månaden.
– I tillegg må regjeringa inkludere fleire kostnader som råvarer og kostnader knytt til smitteverntiltak. Det er berre nokre av tiltaka som hastar å få på plass, seier Krohn Devold.

– Har i praksis yrkesforbod

Virke meiner lettane i koronatiltaka har lite å seie for delane av næringslivet som står slit. Regjeringa opnar for inntil fem gjester i heimen og lettar på tiltaka i skulane. Men pubane og restaurantane får framleis ikkje skjenkje alkohol.

– Sjølv om regjeringa kjem med nokre lettar, har dette svært lite å seie for dei delane av næringslivet som står med kniven på strupen, seier Ivar Horneland Kristensen, administrerande direktør i Virke.
Han peikar mellom anna på serveringsbransjen, reiselivet og treningssentera som i praksis har yrkesforbod, samtidig som dei må planleggje for kvardagen etter krisa.

Fryktar konkursras

Virke ønskjer at regjeringa kjem med ein plan som varer til mange nok i befolkninga er vaksinert til at samfunnet kan gå tilbake til ein meir normal situasjon.
«På kort sikt bør kompensasjonsordninga inkludere de ekstra kostnadene som disse restriksjonene gir bransjene som rammes hardest» skriv Virke i ei pressemelding måndag.
– Her synest eg regjeringa har vore på etterskot. Regjeringa burde ha vore mykje meir offensiv, og sørgt for føreseielegheit for verksemdene våre. Vi risikerer eit konkursras i månadene som kjem, akkurat i det vi byrjar å sjå slutten på dette, seier Horneland Kristensen.

Forsterka ordning for reiseliv og eventbransjen

Det kom fram under forklaringa til statsministeren for Stortinget måndag at Framstegspartiet tilsynelatande har fått gjennomslag for ønsket sitt om ei kraftigare omstillingsordning for bedrifter i event- og reiselivsbransjen.
– Regjeringa vil forsterke omstillingsordninga for reiselivsbransjen endå meir og vil komme med ei eiga utlysing for eventbransjen med underleverandørar, sa Erna Solberg.

Les om dei nye tiltaka og (ekstern lenke)
Virke Reiseliv seier til NTB at dei er glade for at regjeringa har lytta til innspela frå Virke om å føre vidare og forsterke omstillingsordninga retta mot reiselivet og eventbransjen.
– Dette er rett medisin til rett tid. Det blir no viktig at det kjem nok pengar når ordninga blir forsterka. Ordninga er sterkt underfinansiert, seier leiar Astrid Bergmål i Virke Reiseliv.

– Behov for om lag ein milliard kroner

– Så vidt vi kjenner til, er det søkt om over 800 millionar meir frå verksemdene enn det har vore midlar til i dei to første rundane, og det er no behov for om lag ein milliard kroner i friske pengar. Desse midlane vil bidra til aktivitet, forhindre konkursar og redde arbeidsplassar, seier Bergmål.
Ho seier midlane òg vil bidra til at norsk reiseliv kan styrkje konkurransekrafta si, fordi verksemdene får høve til å utvikle nye produkt og tenester tilpassa tida etter korona.
– Dette er eit avgjerande tiltak når vi no skal starte reiselivet igjen, seier leiaren.

Les også: