ANALYSE

Bra betalt er reaksjonen hos aktørar i marknaden på den prisen FSN truleg har gitt for Mørenot, rundt 900 millionar kroner.

Er den vurderinga almen i bransjen kan det freiste mange til å takke ja til invitasjonen som Ulrik Smith i FSN Capital kom med etter at kjøpet av Mørenot vart kjent denne veka. Andre familieeigde selskap i same bransje som Mørenot kan melde seg på om dei vil vere med på ei konsolidering av bransjen. Målet er å vekse - mellom anna ved oppkjøp, både i Noreg og internasjonalt - og då i første omgang rundt Nord-Atlanteren.

Mørenotkonsernet hadde eit resultat før skatt i prosent av driftsinntektene (resultatgrad) på 3,1 prosent i 2016. Det er sånn midt i laget samanlikna med storparten av dei norske konkurrentane i bransjen.

Selskapet lager tauverk, garn og nøter til fiskeri og oppdrett, og har og utvikla utstyr som blir brukt ved seismikkskyting. Fiskeri og oppdrett er dei to viktigaste marknadane.

Eit hakk over konkurrentane ligg Selstad med ein resultatgrad på 7,3 prosent i 2016 og Egersund Group sine to selskap i bransjen; Egersund Net (10,6 prosent) og Egersund Trål (10,2 prosent).

(I tillegg til å lage nøter, garn og beslekta utstyr til fiske- og oppdrett eig Egersund Group også over 50 prosent av Akva Group som lagar oppdrettsanlegg i stål og plast - som omfattar utstyr som mærer, fôrflåtar og settefiskekar. Difor er det resultat i Egersund Net og Egersund Trål som er relevante i denne samanhengen, ikkje konsernet. For Mørenot sitt vedkomande utgjer leveransar til oljebransjen berre cirka fem prosent av dei totale driftsinntektene).

Det er på Egersund/Selstad-nivået bransjen helst bør vere på, både for å kunne gi eigarane ei brukbar avkastning på eigarskapet, og for å ha styrke til å drive med produktutvikling og nyskaping.

Ein bransje med mange aktørar, med ei lønsemd i underkant av det den bør vere er nettopp slikt som investeringsfond ser etter. At FSN Capital vel å satse på Mørenot fortel at investorane ser eit potensiale for både vekst og lønsemd.

Den eine måte å auke lønsemda på er sjølvsagt kostnadskutt, men det er ikkje det FSN Capital satsar på i følgje Smith. FSN Capital vil ha vekst, både organisk og gjennom oppkjøp. Om ikkje marknadane blir større betyr organiske vekst at Mørenot må ta ein større bit av den marknaden som er - altså bli ein tøffare konkurrent. Å kjøpe seg vekst kan ha den posititive biverkanden, sett frå eigarane si side, at Mørenot får ei dominerande rolle - slik at det i større grad kan styre prisane og dermed auke lønsemda. Ved oppkjøp, kven er det eventuelt som står på lista over kandidatar?

Største er Egersund Group, der datterselskap Egersund Net og Egersund Trål tilsaman ikkje er så mykje mindre enn Mørenot.

Om eigarane i det hele tatt vil vurdere å selje er ei sak for seg - etter det NETT NO har grunn til å tru vurderte Egersund Group sjølv å forsøke å kjøpe Mørenot.

Egersund har og eit nett av servicestasjonar som delvis overlappa Mørenot sine. Ved ei samling av dei to får kjøparen dobbelt opp av anlegg. Det vil vere unødvendig, men problemet er at dei overflødige anlegga ligg på plassar der det kan vere tungt å finne alternativt bruk for anlegga. Storleiken på eit Egersund Group/Mørenot gjer og at det kan hende at Konkurransestyresmaktene vurderer at dei samla sett blir for store, sjølv om det ikkje er sannsynleg så lenge dei same styresmaktene godtek av daglegvarehandelen er konsentrert til tre grupperingar. Bortsett frå Egersund Group er resten av konkurrentane mindre enn Mørenot målt i driftsinntekter; Åkreham Trålbøteri i Rogaland, Fiskevegn og Selstad i Vågsøy, Frøystad i Herøy, Nofi Tromsø og Vonin Refa på Finnes i Troms .

Vonin Refa, som også eig Herøyterminalen, har islandske Hampidjan som eigar. Hampidjan trekte seg frå forsøket på å kjøpe Mørenot i konkurransen med FSN Capital. Det viser at selskapet sjølv har ambisjonar om vekst gjennom oppkjøp. Om ikkje Hampidjaan ikkje legger eigne ambisjonar på hylla er ikkje Vonin Refa ein sannsynleg kandidat frå Mørenot si side.

Lønsemda indikerer at Selstad-eigarane kan konkludere med at dei har det best med å drive i eigen regi.Men det gjenstår å sjå. At FSN Capital går inn betyr i alle fall omveltningar i bransjen.