ANALYSE

Rem Offshore varsla denne veka at selskapet opnar for å sleppe långivarane inn på eigarsida.
Det er korkje oppsiktsvekkande eller nytt å opne for å gjere om obligasjonsgjeld til aksjar ved refinansiering av eit aksjeselskap, ei heller hos offshore-selskapa som alt er i gang med prosessen.
(Obligasjonslån er lån frå investorar, med avtalte vilkår og tidspunkt for attendebetaling. Investorane er som regel anonyme, og gjeldsbreva er gjerne omsettlege og ofte børsnoterte).
Det spesielle er at Rem Offshore offentleg og tydeleg seier at ei omgjering av gjeld til aksjar er eit alternativ, same dag som selskapet varslar at det har leigd inn eksperthjelp til å finne ei refinansieringsløysing som kan stå seg gjennom nedturen i offshorebransjen.
Frå første stund er meldinga at omgjering av gjeld til aksjar i selskapet er eitt av tre moglege tiltak i refinansieringsarbeidet, saman med ny eigenkapital og lette i lånevilkåra frå bankane.

Då Havila Shipping i fjor haust starta sitt arbeid med å refinansiere selskapet, var det bankane selskapet forhandla fram eit framlegg til avtalen med. Den avtalen fekk obligasjonseigarane tidleg i år lagt på bordet, med valet mellom ja eller nei.

Det blei nei, og forhandlingane om Havila Shipping pågår framleis.
Slik marknaden har utvikla seg framstår det som svært lenge sidan Havila Shipping starta sine forhandlingar. Det var rett og slett i ei anna tid. Den opphavlege Havila-planen sikta seg inn mot at marknaden skulle lysne rundt 2018.
I dag seier mellom anna DNB sin shippingsjef Kristin Holth at refinansieringsplanane til reiarane må ta høgde for at dei må tåle tøffe tider heilt fram til 2020.
Og obligasjonslångivarane har fått demonstrert både makt og vilje til å bruke den. Det kan ha påverka prosessane hos resten av reiarlaga, som starta sitt refinansieringarbeid etter at Havila var i gang.

Rem Offshore har over fire milliardar kroner i gjeld, som mellom anna inkluderer to obligasjonslån. Eitt på 290 millionar kroner (opphavleg 350 millionar) forfell til betaling i andre kvartal 2018. Det andre, på 500 millionar kroner, forfell til betaling i 2019.
Det gjenstår å sjå korleis obligasjonslångivarane - og aksjonærane med Åge Remøy i spissen - stiller seg til refinansieringa når konkrete framlegg kjem på bordet. Men i utgangspunktet har i alle fall Rem Offshore lagt opp til ein prosess som kan la seg gjennomføre i løpet av få månadar. Kanskje blir det til og med Rem Offshore som kjem først i mål av reiarlaga i Herøy.
Fleire andre reiarlag i nordvest er alt kome eit godt stykke på veg. Både Volstad Shipping og Island Offshore fekk relativt raskt tommelen opp for sine refinansieringsplanar frå sine obligasjonslångivarar. Det same har Golden Energy.
Det betyr ikkje at dei er i mål, men dei har i alle fall passert eit viktig hinder.

Krisa for offshorereiarlaga og forhandlingane om refinansiering viser kor avgjerande obligasjonslångivarane er i ein slik prosess. Det seier seg sjølv at det er lettare å forhandle med ei lita gruppe bankar, enn med ei stor og i utgangspunktet anonym gruppe obligasjonslångivarar. Dess fleire obligasjonslån og dess fleire obligasjonslångivarar, dess meir krevjande kan det bli.
Obligasjonslån var ei grei finansieringskjelde, på toppen av banklåna, då pilene peika oppover.

No er dei eit ekstra kompliserande element, og i etterpåklokskapens lys er det lett å spørre om offshorereiarane ville vere betre stilt i dag om tilgangen på obligasjonslån ikkje hadde vore så god då alt såg lyst ut.
Men svaret er ikkje så opplagt, og det er usannsynleg at obligasjonsmarknaden ikkje blir brukt som finansieringskjelde på ny i framtida.
Då kan erfaringane frå denne krisa gjere det lettare å handtere ei ny.