Ap og Sp nær reint fleirtal

Berre fem mandat skil Arbeidarpartiet og Senterpartiet frå reint fleirtal på Stortinget, viser ei ny meiningsmåling frå Opinion.

Augustmålinga, som er gjort av Opinion for FriFagbevegelse , Dagsavisen og Avisenes Nyhetsbyrå (ANB), viser at Sp-leiar Trygve Slagsvold Vedum ikkje er langt unna å få draumeregjeringa si beståande av Sp og Ap.

I målinga aukar Sp oppslutninga si til 19,2 prosent (+0,6 prosentpoeng) og pustar dermed Ap i nakken. Det skil berre 3,4 prosentpoeng til Aps oppslutning på 22,6 prosent (-1,7).

– Det er interessant at Ap og Sp nærmar seg kvarandre, men spriket er større viss vi tek utgangspunkt i snittet på målingane. Blir dette valresultatet, vil det likevel setje Sp i ein sterk posisjon i regjeringsforhandlingane, seier valforskar Johannes Bergh ved Institutt for samfunnsforskning, til Fri Fagbevegelse.

På målinga er det SV som har størst framgang. SV-leiar Audun Lysbakken kan smile over ei oppslutning på 8,8 prosent, som er ei forbetring på 2,7 prosentpoeng frå målinga i juni.

På borgarleg side får Høgre 22,1 prosent (-1,6), medan regjeringspartnar Venstre ligg på 3,8 prosent (+1,5).

MDG får ein tilbakegang på 1,2 prosentpoeng til 3,5, men målinga er gjord før FNs klimarapport vart lagt fram denne veka.

For resten av partia ser målinga slik ut: Frp 9,3 (-1,1), KrF 4,0 (+0,3), Raudt 3,8 (-0,9), Andre 3,8 (+1,4).

Undersøkinga er gjennomført mellom 3. og 8. august blant 964 personar. Feilmarginen varierer mellom 1 og 3 prosentpoeng.