Blad fall av vindturbin

Eit blad har falle av ein av dei store vindturbinane som er oppførte på Frøya ved Trondheimsfjorden. Uhellet har truleg skjedd natt til fredag.

– Vi kjenner ikkje årsaka til at turbinbladet er skadd, men stoppar turbinane inntil vidare og ber leverandøren Vestas ta ein inspeksjonsrunde, seier konserndirektør for kommunikasjon i Trønderenergi, Stig Tore Laugen, til VG.

Vindturbinane med tre blad er 180 meter høge. Turbinleverandøren Vestas eig og driftar turbinane i ein oppstartsfase.

– Det vart registrert lyn på Frøya onsdag, så det vil vere naturleg å undersøkje om det har samanheng med skaden som har oppstått på vengebladet, seier Laugen.