Brems i arbeidsinnvandringa

NPK-NTB: Fleire austeuropeiske land opplever rekordlåg arbeidsløyse og betre økonomi. Det fører til at fleire austeuropearar flytter frå Noreg og heim.
– Vi såg ein topp på arbeidsinnvandringa i 2012, men vi ser no at det er færre, særleg polakkar og litauarar, som flytter til Noreg, seier Adrian Haugen Ordemann i Statistisk sentralbyrå (SSB) til .
Berre dei siste åra har den årlege nettoinnvandringa av litauiske, polske og svenske statsborgarar til Noreg falle med 16.000 personar. I 2016 var desse dei største gruppene som utvandra frå Noreg.
Etter at Polen blei medlem av EU i 2004, kom ein straum av unge menn mellom 20 og 40 år til Noreg. No går likevel økonomien i landet godt, samtidig som behovet for sysselsetting innan byggjebransjen og industri er stort.
Ifølgje tal frå Eurostat har arbeidsløysa i Polen, Litauen og Tsjekkia fall betrakteleg dei siste fire åra.
Sjefanalytikar i Nordea, Anders Svendsen, meiner likevel at den aukande utflyttinga av austeuropearar ikkje vil føre til store konsekvensar her til lands.
– Polakkane har jo hatt yrka med dei lågaste lønningane i Noreg. Om det skulle bli stor mangel på arbeidskraft der, vil nok lønningane bli justert opp så dei jobbane blir attraktive.