DNB-tilsette vart oppmoda til å jobbe heimanfrå ved sjukdom

Ein banksjef ved eit lokalt DNBs kontor oppmoda sine tilsette til å få utført noko jobb dersom ein ikkje er «sengeliggende» heime med sjukdom.

NPK-NTB

08.11.2023

I ein e-post skreiv banksjefen ei oppmoding om å ha med ein PC heim. Dersom ein ikkje er «sengeliggende» vil det på den måten vere mogleg å gjere noko arbeid ved eigen eller barns sjukdom, heitte det i e-posten, som E24 har fått sjå.

«Ikke minst» kan ein følgje med på team-sendingar eller leggje inn fråværsmarkeringar, skreiv banksjefen vidare, som understreka at det ikkje var eit krav, men ei oppmoding til alle.

E-posten gjekk ut til omtrent 20 tilsette på det aktuelle DNB-kontoret, opplyser kommunikasjonsrådgivar Terje-André Kvinlaug i DNB til E24.

– Vi forstår reaksjonane og ønskjer å understreke at helsa alltid kjem først. Det er inga forventning i DNB om å jobbe når du er sjuk, opplyser han.