Eldreomsorg viktigast for folk ved valet

(NPK-NTB): Eldreomsorg er den saka som har engasjert flest veljarar i valet, sjølv om det ikkje er éi enkelt sak som peikar seg spesielt ut i år.

Det viser ei undersøking Repons har utført for VG. 13 prosent seier eldreomsorga har vore viktigast, framfor helse- og sjukehus, klima og miljø og skattar og avgifter (alle med 11 prosent).

– Det har ikkje vore éi sak som har utmerkt seg, seier Jonas Stein, førsteamanuensis i statsvitskap ved Universitetet i Tromsø.

– Litt klima, litt skule, litt eldreomsorg også er kanskje det nye at det har vorte meir fokus på privatøkonomien til folk, seier han.

Valforskar Johannes Bergh ved Institutt for samfunnsforskning seier at undersøkinga viser at folk er opptekne av saker som er relevante for eit kommune- og fylkestingsval.

– Det er eit knippe av saker veljarane er opptekne av. I det førre lokalvalet var klima den viktigaste saka, seier Bergh.

(©NPK)