Etterforskar fleire saker mot utru banktilsette

(NPK-NTB): Talet på banktilsette som er mistenkte for samarbeid med kriminelle miljø aukar. Finans Norge åtvarar mot nye «infiltratørar» og «rekrutterte» i finansnæringa.

– Per no er det sju igangverande etterforskingar mot moglege utru tenarar i norsk banksektor, seier Økokrim-sjef Pål Lønseth til Dagens Næringsliv.

Aldri før har så mange banktilsette vorte etterforska for systematisk samarbeid med kriminelle aktørar.

Torsdag vart det kjent at ein tilsett i DNB er sikta for grovt underslag av 9,5 millionar kroner, etter at leiinga i banken varsla politiet om forholdet.

Økokrim-sjefen opplyser at etterforskingane rettar seg mot personar dei mistenkjer for kriminell aktivitet eller for å ha delt informasjon med kriminelle.

Ifølgje Lønseth omfattar sakene både lekkasje av sensitiv kundeinformasjon og misbruk av tilgang til banksystema.

Ein ny rettleiar frå Finans Norge pålegg bankane å vere spesielt merksame på tilsette med tilknyting til land som norske tryggingstenester har definert som høgrisikoland.

(©NPK)