Første havvindkontrakt signert

(NPK-NTB): Energiminister Terje Aasland (Ap) deltok fredag på ei symbolsk kontraktssignering for å markere at Ventyr får den historiske oppgåva med utbygging av havvind i Nordsjøen.

Kontrakten for prosjektet, som er det første for utbygging av ein havvindpark i Nordsjøen, vart signert tidlegare denne veka. Utbygginga skal skje i den sørlege delen av Nordsjøen.

– Dette markerer ein stor milepæl i Noregs satsing på fornybar energi. Eg har stor tru på at Sørlige Nordsjø II kan vere ein katalysator for å nå ambisjonane våre for havvindindustri i Noreg, seier Aasland i ei pressemelding.

Ventyr nytta høvet fredag til å presentere prosjektplanane sine for energiministeren. Dei seier dei er begeistra over oppgåva om å utvikle fornybar energi til havs.

– Vi har som mål å skape ei positiv endring gjennom innovasjon innan fornybar energi og samtidig bidra til å skape ringverknader både i lokalsamfunn og i Noreg, seier konsernsjef François van Leeuw i Parkwind på vegner av Ventyr.

Ventyr SN II er eigd av Parkwind, som er ein del av det globale fornybare energiselskapet JERA Nex, og Ingka Investments - investeringsselskapet til Ingka Group, som er den største IKEA-forhandlaren.

(©NPK)