Ferjer og passasjerbåtar kan bli råka av streik

(NPK-NTB): Sjømannsorganisasjonane og NHO Sjøfart har fram til midnatt fredag å bli samde. Laurdag kan det bli ferjestreik. 33 ferjesamband kan rammast.

– Vi legg mykje arbeid i å balansere uttaka, slik at vi ikkje isolerer nokre samfunn, men ein må førebu seg på at det blir litt kø, seier administrerande direktør og forhandlingsleiar for Norsk Sjøoffisersforbund, Hans Sande til NRK.

Torsdag byrja meklinga mellom sjømannsorganisasjonane og NHO Sjøfart.

Dersom det blir streik, vil det bli mange innstillingar på dei store E39-sambanda på Vestlandet. Også sambandet Moss-Horten blir ramma.

Passasjertrafikken mellom Aker brygge og Nesodden, og hurtigbåtruta mellom Tromsø og Harstad står også i fare.

– Det er ikkje nokon ønskt situasjon, men vi er klare for streik, om det er det som må til, seier Sande vidare.

Det viktigaste kravet til Norsk Sjøoffisersforbund er auka kjøpekraft. Tillitsvald for om lag 300 tilsette i Fjord1, seier at streikeviljen er stor.

– Vi er hos Riksmeklaren av ein grunn, seier Pedersen.

Fartøy som har beredskapsfunksjonar, blir ikkje teke ut.

(©NPK)