Fleire milliardærar i Noreg

(NPK-NTB): Aldri før har det vore fleire milliardærar i Noreg. Ifølgje Kapitals oversikt er det no 444 milliardærar i landet – og rikast av dei alle er John Fredriksen.

Ifølgje finansmagasinet Kapitals årlege liste over Noregs 400 rikaste i landet, held det ikkje å berre vere milliardær for å komme på lista. I år må ein ha ein formue på 1,2 milliard kroner.

– Samla formue for Noregs 400 rikaste er no 1.884 milliardar kroner. Det svarer til ein auke på 11 prosent frå i fjor og er eit historisk høgt tal, konstaterer Kapitals ansvarlege redaktør Trygve Hegnar.

Ifølgje finansmagasinet har det vorte 37 nye milliardærar i Noreg i det siste året.

For 20. år på rad toppar skipsreiar John Fredriksen (78) riking-lista, med ein estimert formue på 124 milliardar kroner. Fredriksens konto har vakse med ti milliardar sidan i fjor.

På dei to neste plassane finn vi Rema 1000-eigar Odd Reitan og hedgefondforvaltar Ole Andreas Halvorsen, som Kapital meiner har ein samla formue på høvesvis 64 og 62,5 milliardar kroner.

Lista blir dominert av menn. Vi må heilt ned på 29.-plass for å finne ei kvinne. Noregs rikaste kvinne er reiararving Else Helene Sundt (43), med ein estimert formue på 8,7 milliardar kroner.

(©NPK)