Foreslår fleire endringar i nettleiga

(NPK-NTB-Marius Helge Larsen): Reguleringsmyndigheita for energi (RME) foreslår å justere nettleiga, sånn at summen i større grad blir bestemd av toppforbruket.

– Det er viktig at nettleiga gir eit rett og effektivt prissignal. Derfor oppmodar vi nettselskapa til å vurdere justeringar som gjer det meir lønnsamt for forbrukarar å tilpasse forbruket slik at dei kan få lågare nettleige, seier seksjonssjef Torfinn Jonassen i Reguleringsmyndigheita for energi (RME). I 2022 vart ei ny ordning for nettleige rulla ut. No består nettleiga av to delar: * Ein sum som blir bestemd ut frå kor mykje straum ein bruker (energiledd) * Ein sum som blir bestemd ut frå kor stort toppforbruket ditt er i løpet av månaden (fastledd) Dei som har dei høgaste toppane, betaler mest nettleige, medan dei som har lågare toppforbruk betaler mindre

Reguleringsmyndigheita for energi (RME) har no evaluert ordninga og sendt eit brev til Energidepartementet med konklusjonane sine. Dei meiner det er viktig å vurdere den nye nettleigemodellen i lys av straumstøtta og noregspris.

– Med noregspris får straumkundane ein fastpris på straumen dei forbruker, og mistar dermed prissignalet som spotprisen gir. For kundar som har noregspris, er det berre gjennom nettleiga kundane får prissignal som motiverer til flytting av forbruk, skriv RME.

Reguleringsstyresmakta kjem med to tilrådingar på kort sikt:

• Å dele fastleddet opp i fleire og mindre pristrinn, på 1kw. Dermed vil det vere mindre avstand mellom dei ulike priskategoriane, noko RME meiner kan oppmuntre til meir straumsparing.
• Auke andelen pengar som blir tekne inn i kapasitetsleddet, altså at større del av rekninga skal bestemmast ut frå toppforbruket. 

– For at nettleigemodellen skal kunne fungere effektivt som eit prissignal, bør flest mogleg kundar ha insentiv til å justere forbruket sitt. Nettselskapa må samtidig passe på at nettleiga ikkje blir oppfatta som å vere for komplisert, skriv RME i brevet til departementet. 

På sikt foreslår dei også å tidsdifferensierte energileddet i større grad, altså at straumforbruket gir ulike utslag på nettleigerekninga på ulike tidspunkt.

I dag differensierer dei fleste nettselskapa mellom dag og natt, og prisane er billigare på natta når belastninga på nettet er lågare.

– Tidsdifferensieringa kan gjerast meir finmaska og differensieringa i pris kan vere større, skriv RME.

(©NPK)