Fylkeskommunen aukar støtta til iKuben

iKuben arbeider med tiltak som bidrar til å styrke medlemsbedriftene sin konkurranseevne. Møre og Romsdal fylkeskommune løyver 4 500 000 kroner for perioden 2018 – 2020.
Medlemsbedriftene i NCE iKuben er i hovudsak globale aktørar og viktige industribedrifter både nasjonalt og regionalt. Økonomien i verda er i rask endring, det same er utviklinga av ny teknologi. Dette utfordrar konkurranseevna og posisjonen til etablerte selskap.
- Framtida for arbeidsplassane og industrien i Møre og Romsdal er avhengig av at bedriftene er i stand til å ligge i front, seier leiar for regional- og næringsutvalet, Runar Vestheim, på heimesida til fylkeskommunen.

Kom nyleg med i NCE

iKuben kom nyleg med i det statlege klyngeprogrammet Norwegian Centre of Expertise (NCE). Klynga har sidan 2012 hatt status som Arenaprosjekt, og fylkeskommunen har vore inne med støtte også her.
NCE iKuben har hatt stor aktivitet gjennom heile Arenaperioden og har sett i verk ei rekke forskings- og utviklingsprosjekt i regi av medlemsbedriftene. Nye produksjonsprosessar, forretningsmodellar hos dei deltakande bedriftene er nokre av resultata.
NCE iKuben bygger nettverk mellom bedriftene, forskings- og utviklingsinstitusjonane og andre klynger. Det er også etablert samarbeid mellom nasjonale og internasjonale kompetansemiljø.