Første heilelektriske hurtigbåt

Reiarlaget Norled skal hjelpe til med teknisk ekspertise og rådgiving under bygginga av den nye fullelektriske hurtigbåten til Kolumbus og Fjellstrand, MS Medstraums.

– Vi er veldig glade for å kunne jobbe på eit så spennande prosjekt, seier administrerande direktør i Norled, Heidi Wolden, til Skipsrevyen.

Norled har sidan utviklinga av den første elektriske ferja i verda, MF Ampere, jobba med nullutsleppsløysingar for både ferje og hurtigbåt.

Norled vil saman med kollektivselskapet Kolumbus og verftet Fjellstrand bidra med teknisk bistand innanfor skipsdesign, elektro, navigasjon, sikkerheit og energiforbruk.

I tillegg vil Norled følgje opp bygginga av fartøyet, utarbeide drifts- og vedlikehaldsprogram, og delta i planlegging av testing og ferdigstilling. Arbeidet vil starte i mai dette året og gå føre seg fram til hurtigbåten er klar for test og ferdigstilling i mars 2022.

Fartøyet vil bli sett inn i rutedrift og bli operert av Norled i Kolumbus sine ruter til byøyane i Stavanger og Hommersåk i Sandnes. Fartøyet skal byggjast hos verftet Fjellstrand AS.