Grandiosa-gulfargen blir verna

(NPK-NTB): Først var det Stratos-sjokoladen som fekk merkevarebeskytta blåfargen. No blir også Grandiosa-gul verna.

Ingen andre frosenpizzaprodusentar kan no nytta seg av gulfargen etter Patentstyrets avgjerd, skriv Nettavisen.

Orkla står bak begge merkevarene, både Stratos og Grandiosa. Konkurrenten Rema 1000 har prøvd å stoppa Orkla frå å skaffa seg einerett til fargen i pizzasamanheng.

Orkla har dokumentert at gulfargen er innarbeidd som eit varemerke blant folk. I ei undersøking svarte 74 prosent at dei knytte gulfargen til Grandiosa.

Søknaden om retten til gulfargen vart sendt inn allereie i 2022, men saka vart sett på vent for å avventa utfallet av Stratos-saka, ifølgje seksjonssjef for design og varemerke i Orkla, Knut Andreas Bostad.

Rema kan framleis komma med ei formell innvending eller leggja saka fram for retten dersom dei er usamde i Patentstyrets vurdering.

Rema 1000 har førebels ikkje kommentert saka overfor Nettavisen.

(©NPK)