Har meldt bedrageri for 600 millionar

(NPK-NTB): Skatteetaten har meldt 67 personar etter at det er avdekt omfattande momsbedrageri mot etaten. Bedrageria omfattar nesten 600 millionar kroner.

Det dreier seg om pengar som anten har vorte urettmessig utbetalte eller freista refunderte, skriv Dagens Næringsliv.

Dei 67 meldingane er sende til ni ulike politidistrikt og til Økokrim. Det er venta at ti saker til vil bli melde no i haust.

– Dette er alvorlege saker, så vi har ei forventning om at dei blir følgde opp av politiet, seier skattedirektør Nina Schanke Funnemark.

Skattekrimsjef Erik Nilsen seier at det i dei 600 millionane er éi sak som er blant dei største dei har hatt på meirverdiavgiftsområdet.

– Så er det nokre meldingar som er store, og nokre av litt mindre karakter, seier han.

Meldingane for skattesvik eller grovt skattesvik gjeld fleire personar som har vore under Skatteetatens oppsyn over tid. Ifølgje Nilsen er dei same aktørane ofte involverte i andre former for økonomisk kriminalitet.

(©NPK)