Hardare konkurranse om torsken

(NPK): Om torskekvoten blir kutta med ti prosent neste år, i tråd med kvoterådet, blir det knallhard konkurranse om råstoffet og enda høgare prisar.
– Det er ein klar og veldokumentert samanheng mellom prisar og kvotar. Ein nedgang i torskekvotane på 10 prosent fører til ein prisauke på vel 25 prosent, seier sjømatanalytikar Jan Trollvik til .
Auka etterspørsel og lågare kvotar den siste treårsperioden har allereie ført til ei dobling av torskeprisen. I 2013 gjekk torsken for 13 kroner kiloen, i år er prisen 25 kroner. Og neste år kan altså kiloprisen komme godt over 30 kroner.
Konsernsjef Thomas Farstad i Norway Seafoods ventar seg òg hardare konkurranse om fisken neste år.
– Konkurransen om råstoffet er intens. Det blir etablert fleire nye selskap i ein marknad med mindre fisk, og da aukar konkurransen ytterlegare, seier Farstad.
Resultatet er gode prisar til fiskarane, men lågare marginar for fiskeindustrien.
– Det er openbert at marginane i fiskeindustrien er redusert i år samanlikna med i fjor. Prisauken på torsk til fiskarane betyr mindre marginar til industrien, seier Farstad til avisa. (©NPK)