IEA spår dobla straumforbruk frå datasenter

NPK-NTB-AFP: Straumforbruket frå datasenter er venta å bli meir enn dobla fram mot 2030, seier Det internasjonale energibyrået (IEA).

Dette skaper store utfordringar for energi- og klimapolitikken, understrekar byrået.

Bakgrunnen er den store veksten i bruk av såkalla generativ kunstig intelligens (KI). I 2024 stod datasenter for knappe 1,5 prosent av det globale straumforbruket, men det har auka med 12 prosent i året dei siste fem åra. Generativ KI krev enorme mengder datakraft for å behandle informasjon som er samla i store databasar.

Om utbygginga held fram i noverande tempo aukar straumforbruket frå datasenter på verdsbasis til 945 terawattimar årleg innan 2030 – eller 3 prosent av straumforbruket i verda.

Akkurat no står kol for rundt 30 prosent av straumen som trengst for å forsyne datasenter, men fornybare energikjelder og naturgass er venta å auke sine andelar av dette framover. Likevel vil den store veksten i datasenter likevel uunngåeleg føre til aukar i klimagassutslepp knytt til straumforbruk, meiner IEA.