Inntil 100 Deloitte-tilsette kan misse jobben

(NPK-NTB): Deloitte, eit av dei største revisjons- og konsulentfirmaa i verda, skal redusera bemanninga i Noreg. Det kan ramma opptil 100 tilsette.

– Avgjerda om nedbemanning er ei av dei vanskelegaste avgjerdene me har teke og ein veldig lei beskjed å gi til gode kollegaer, seier administrerande direktør Cecilia Flatum i Deloitte Norge i ei pressemelding.

Endringane blir gjorde for å rusta selskapet for framtida, og dei kjem som følgje av endringar i marknad og etterspurnad, og dessutan sal av regionkontor, opplyser Deloitte.

Nedbemanninga kan utgjera ein reduksjon i talet på tilsette på rundt 6 prosent. Dei som blir ramma får tilbod om sluttpakkar og støtteordningar, inkludert karriererettleiing og hjelp til omstilling. 

Deloitte leverer revisjon, advokattenester, finansiell rådgiving, risikoanalysar og konsulenttenester. Selskapet blir rekna som eitt av dei fire store innan revisjon og konsulenttenester saman med PricewaterhouseCoopers, Ernst & Young og KPMG.

(©NPK)